«Everton» va «Sanderlend» o‘rtasidagi bahsning asosiy vaqti 1:1 hisobida yakunlandi. Qo‘shimcha bo‘limlarda ham g‘olib aniqlanmagach, penaltilar seriyasida mehmonlar ustun keldi.
Uchrashuvdagi hisobni 30-daqiqada «Sanderlend» ochdi: Enso Le Fe bir teginishda zarba berib, to‘pni pastki burchakka yo‘lladi. «Irislar» uzoq vaqt imkoniyat izlagan bo‘lsa-da, hujumda sur’atni keskin oshirmadi. Shunga qaramay, 89-daqiqada Jeyms Garner penaltini aniq amalga oshirib, muvozanatni tikladi — 1:1.
Ekstra taymlarda to‘p nazorati ko‘proq «Everton» tomonida bo‘ldi, «qora mushuklar» esa standart vaziyatlar va o‘rta masofadan zarbalar bilan javob qaytardi. Bir epizodda Jordan Pikford Mandlning zarbasidan keyin jamoasini qutqarib qoldi. Ammo 120 daqiqada ham g‘olib aniqlanmadi.
Penaltilar seriyasida hal qiluvchi rol «Sanderlend» darvozaboni Robin Rufsga tegishli bo‘ldi: u Garner, Barri va Betuning zarbalarini qaytardi. Mehmonlar safida esa Le Fe, Granit Jaka va Luk O‘Nyen o‘z urinishlarini golga aylantirdi. Yakunda «Sanderlend» seriyada 3:0 hisobida g‘alaba qozonib, «Everton»ni musobaqadan chiqarib yubordi.
“Zamin”ni Telegramʻda oʻqing!
