Angliya Premer-ligasining 21-turida «Manchester Siti» o‘z maydonida «Brayton»ni qabul qildi va bahs 1:1 hisobida yakunlandi. Gollar 41-daqiqada penaltidan Erling Xoland hamda 60-daqiqada Kaoru Mitoma tomonidan kiritildi.
Ushbu bellashuv biz uchun yana bir jihati bilan qiziq: «shaharliklar» safida to‘p surayotgan legionerimiz Abduqodir Husanov uchrashuvni to‘liq o‘tkazdi. Himoyachi maydondagi har bir epizodda o‘zini ishonchli tutib, raqibning tezkor hujumlariga qarshi kurashda faol harakat qildi. Ayniqsa, Gvardiola maqtovi fonida muxlislar uchun eng qiziq savol bitta edi: kechagi o‘yinda Husanov qay darajada baholandi?
Nufuzli analitik platformalarning baho berish natijalari quyidagicha:
- Sofascore — 7.1 ball
- Flashscore — 7.3 ball
- Whoscored — 7.1 ball
- FotMob — 7.8 ball
Ko‘rinib turibdiki, baholar o‘rtasida farq bor, lekin umumiy manzara bir xil: Husanovning o‘yini “o‘rtadan yuqori” darajada, ayniqsa FotMob unga ancha baland baho berdi. Ya’ni, maydonda “oddiy qatnashib yurdi” emas — ish bor, harakat bor, ta’sir bor.
Endi «Manchester Siti»ni APLning 22-turida katta sinov kutib turibdi: jamoa «Old Trafford»da «Manchester Yunayted» mehmoni bo‘ladi. Derbi — bu har doim boshqa kayfiyat: bitta to‘p, bitta qaror, bitta epizod hamma narsani o‘zgartirib yuboradi. Muxlislar esa albatta Husanovning u yerda qanday chiqish qilishini yanada qiziqish bilan kutadi.
“Zamin”ni Telegramʻda oʻqing!
