A Seriyaning 20-turida «Roma» «Sassuolo» ustidan 2:0 hisobida g‘alaba qozondi. Rimliklar uchrashuv taqdirini so‘nggi daqiqalarga yaqin hal qildi: har ikki gol ham 77-daqiqadan keyin urildi.
Birinchi bo‘limda «Roma» to‘p nazoratida ham, jarima maydoniga kirib borishlar sonida ham ustun ko‘rindi, biroq yakunlovchi zarbalarda aniqlik yetishmadi. Jumladan, Dibala jarima maydoni markazidan zarba berganida to‘p nishondan chetga o‘tdi. Orada Fergyuson bel qismidan jarohat olib, o‘yinni davom ettira olmadi va uning o‘rniga El-Shaaravi maydonga tushdi.
«Sassuolo» asosan kam sonli qarshi hujumlar bilan javob qaytardi. Eng xavfli vaziyatda Fadera Matichning pasidan so‘ng zarba berdi, biroq darvozabon Svilar yaqin burchakdagi zarbani qaytarib, jamoasini qutqarib qoldi.
Tanaffusdan keyin «jallorossi» qanotlar orqali bosimni yanada kuchaytirdi: Simikas va Chelik muntazam ravishda jarima maydoniga uzatmalar yo‘lladi. 62-daqiqada hakam Murichning Soulega qarshi ishlatgan qo‘pol harakati uchun penalti belgiladi, ammo VAR ofsaydni qayd etib, qaror bekor qilindi.
Shunga qaramay, «bo‘rilar» raqibini sindira oldi. 77-daqiqada Soule qanotdan aniq oshirdi, Kone esa havodagi kurashda ustun kelib, bosh bilan hisobni ochdi. Oradan ko‘p o‘tmay «Sassuolo» oldinga o‘tib ketib, ortda bo‘shliqlar qoldirdi va «Roma» bundan foydalandi: 79-daqiqada Soule Gilardining uzatmasini golga aylantirib, hisobni 2:0 ko‘rinishiga keltirdi.
A Seriya. 20-tur
Roma – Sassuolo 2:0
Gollar: Kone 76, Soule 79
Roma – Svilar, Jilardi, Manchini, Ermoso, Chelik, Kone, Pisilli, Simakas (Vesli, 62), Soule, Fergyuson (El Shaaravi, 39), Dibala.
Sassuolo – Murich, Valukiyevish, Idzes, Muharemovich, Doig, Lipani, Matich, Kone, Fadera (Cheddira, 73), Pinamonti, Laurent.
“Zamin”ni Telegramʻda oʻqing!
