Futbol eksperti Aleksandr Tochilin «Yevro-Futbol.Ru» nashriga bergan eksklyuziv intervyusida FIFA prezidenti Janni Infantino Rossiya jamoalariga qo'yilgan cheklovlar bekor qilinishi kerakligi haqidagi fikrlari hamda OAVda XOQ Rossiya sportiga nisbatan sanksiyalarni yaqin orada olib tashlashi mumkinligi haqida tarqalgan xabarlarga munosabat bildirdi. Bu haqda euro-football.ru xabar beradi.
Jahon OAVlari XOQning Milan yig'ilishida Rossiya sportiga qo'yilgan barcha sanksiyalarni tez orada bekor qilish bo'yicha prinsipial qaror qabul qilingani haqida yozmoqda. Tochilinning aytishicha, u bunday yangilik ro'yobga chiqishiga umid qiladi, chunki bu mavzu uzoq vaqtdan beri muhokama qilinmoqda.
Mutaxassisning fikricha, Rossiyaning izolyatsiyadan chiqishi uchun Yevropada aniq va qat'iy qaror zarur. U shuningdek, Rossiyasiz yirik musobaqalarning intriga va ommabopligi pasayishini tashkilotchilar ham tushunayotganini ta'kidladi.
Infantinoning Rossiya jamoalarini chetlatish «ma'nosiz» ekani haqidagi bayonotiga to'xtalgan Tochilin, bu dunyoda kechayotgan jarayonlar fonida mantiqli signal ekanini aytdi. Uning ta'kidlashicha, Rossiyaga nisbatan ikkiyoqlama standartlar ko'rinib tursa-da, vaqt o'tishi bilan ko'p narsa o'zgaradi va taqiqning o'zi ham absurd holat ekani tobora ravshanlashmoqda.
Tochilin XOQ sanksiyalarni olib tashlasa, bu futbolga ham bevosita ta'sir ko'rsatishini istisno etmadi. Unga ko'ra, agar shunday katta tashkilot ijobiy qadam tashlasa, bu pretsedent bo'ladi va boshqa tuzilmalar ham o'z qarorlarini qayta ko'rib chiqishga majbur bo'ladi.
Infantino kelajakda siyosat sabab jamoalarni chetlatishni qonunan taqiqlash kerakligini ham aytgan. Tochilin esa sportning asosiy shiori — u siyosatdan xoli bo'lishi kerakligi, Rossiyaga nisbatan qabul qilingan qarorlar esa aynan shu tamoyilga zid kelayotganini qayd etdi.
Shuningdek, OAV FIFA aprel oyidagi navbatdagi kongressda Rossiyaning xalqaro turnirlarga to'liq qaytishi masalasini muhokama qilishi mumkinligini yozmoqda. Tochilin buni inkor etmadi va agar bunday gap-so'zlar ketayotgan bo'lsa, demak, bu axborot havodan olinmayotganini, ijobiy ssenariy haqida o'ylash mumkinligini bildirdi.
U Rossiyaga ruxsat berilgandan keyin ham ayrim raqiblar o'ynashdan bosh tortishi ehtimoli borligini tan oldi. Bunday vaziyatda reglamentga tayangan holda intizomiy choralar qo'llanishi, zarurat bo'lsa texnik mag'lubiyatlar ham berilishi kerakligini aytdi — bu esa boshqalarga ham demarshlar foyda keltirmasligini ko'rsatadigan signal bo'ladi.
Elena Grigoryevskaya
“Zamin”ni Telegramʻda oʻqing!
