Xiaomi kompaniyasi oʻzining yangi Mijia Side-by-Side 561L muzlatkichi sotuvga chiqqanini eʼlon qildi. Qurilmaning boshlangʻich narxi 1899 yuan (taxminan 280 dollar) etib belgilangan boʻlsa, davlat subsidiyalari bilan uni 1614 yuanga (240 dollar) xarid qilish mumkin. Bu haqda Ixbt.com xabar beradi.
Muzlatkichning umumiy hajmi 561 litrni tashkil etadi: shundan 351 litri sovutish kamerasi, 210 litri esa muzlatish qismiga ajratilgan. Ichki makon 18 ta saqlash zonasi, ikki qatorli keng eshik javonlari va balandligi sozlanadigan shisha tokchalar bilan jihozlangan. Eshiklar 90 darajaga ochilishi tufayli qurilmani devorga yaqin yoki burchaklarga qulay joylashtirish imkoniyati mavjud.
Texnik jihatdan Xiaomi Mijia Side-by-Side 561L kumush ionli modullar bilan jihozlangan boʻlib, bu antibakterial himoya va yoqimsiz hidlarni yoʻqotishni taʼminlaydi. Shuningdek, 360 darajali havo aylanish tizimi, invertorli kompressor va ventilyator hamda harorat tebranishlarini nazorat qiluvchi 4 ta datchik oʻrnatilgan.
Smart qurilma sifatida u Mijia ekotizimiga toʻliq integratsiya qilingan. Foydalanuvchilar haroratni sensorli panel, mobil ilova yoki Xiao AI ovozli yordamchisi orqali masofadan boshqarishlari mumkin. Shu bilan birga, kompaniya yanada kattaroq hajmli Mijia Refrigerator Pro Folio 620L modelini ham 370 dollar narxda namoyish etdi.
“Zamin”ni Telegramʻda oʻqing!
