Marc-André ter Stegenning Barselona bilan shartnomasi davom etayotgan boʻlsa-da, uning klubdagi sport kelajagi yakunlangan koʻrinadi. Kataloniya klubi darvozabonni jamoani tark etishiga ruxsat berishga tayyor, biroq hozircha faqat ijara varianti eng mantiqiy yoʻl sifatida koʻrilmoqda. Bu haqda Goal.com xabar beradi.
Ispaniyaning Mundo Deportivo nashri xabariga koʻra, 2028-yilgacha shartnomasi bor boʻlgan ter Stegenning toʻliq transferini amalga oshirish juda murakkab vazifa. Sobiq sardorning yuqori maoshi va soʻnggi paytlardagi jarohatlari tufayli boshqa klublar bunday moliyaviy tavakkalga qoʻl urishni istashmayapti.
Oʻtgan yozda Barselona Espanyol jamoasidan Joan Garcia bilan shartnoma imzolab, uni asosiy darvozabonga aylantirgan edi. Ter Stegen esa belidagi jarohatidan soʻng oʻyin amaliyotiga ega boʻlish uchun yanvar oyida Jirona safiga ijaraga oʻtgandi. Biroq u yerda bor-yoʻgʻi ikki oʻyinda maydonga tushib, sonidan jarohat oldi va Jahon chempionatini oʻtkazib yuborishga majbur boʻldi.
Xabarlarga koʻra, darvozabon sogʻayib qaytgach, Barselona uni yana ijaraga berib yubormoqchi. Nashr uni jamoa tarkibidagi "issiq kartoshka" deb atamoqda. Jirona bilan boʻlgan kelishuvda boʻlgani kabi, "koʻk-anorranglilar" 34 yoshli posbonning maoshini katta qismini toʻlab berishga majbur boʻlishlari mumkin.
Ter Stegen 2014-yilda Borussiya Mönchengladbach klubidan 12 million yevro evaziga transfer qilingan edi. U 12 yil davomida kataloniyaliklar sharafini himoya qilib, koʻplab sovrinlarni qoʻlga kiritdi, biroq endi uning Barselona bilan xayrlashish vaqti kelgan koʻrinadi.
“Zamin”ni Telegramʻda oʻqing!
