London Qirolicha Mariya universiteti, Uorik universiteti va Imperial kolleji olimlari havodagi namlikni elektr energiyasiga aylantiruvchi barqaror va biologik parchalanadigan Moisture-Electric Generator (MEG) qurilmasini yaratishdi. Ushbu ixtironing oʻziga xosligi shundaki, u toʻliq oziq-ovqat mahsulotlari — jelatin, osh tuzi va faollashtirilgan koʻmirdan tayyorlangan boʻlib, atrof-muhit va inson salomatligi uchun mutlaqo xavfsizdir. Bu haqda Ixbt.com xabar beradi.
Anʼanaviy elektronika uchun namlik zararli omil hisoblansa, MEG texnologiyasi undan energiya manbai sifatida foydalanadi. Jelatin va tuz aralashmasi quriganida uch qatlamli strukturaga aylanadi. Namlik taʼsirida ushbu qatlamlarda ionlar erkin harakatlana boshlaydi va bitta modul 30 kundan ortiq vaqt davomida 1 volt atrofida barqaror kuchlanish beradi. Bir nechta modullarni ketma-ket ulash orqali olimlar 90 voltgacha kuchlanish va 5,08 mA tok olishga muvaffaq boʻlishdi, bu esa 40 ta svetodiodli chiroqlarni yoqish uchun yetarlidir.
Yangi material nafaqat energiya manbai, balki oʻta sezgir datchik vazifasini ham bajaradi. Elektr signallarining namlik oʻzgarishiga javobi shunchalik aniqki, undan nafas olishni kuzatish, nutqni havo oqimi orqali aniqlash va kontaktsiz boshqaruv interfeyslarida foydalanish mumkin. Bu, ayniqsa, taqiladigan tibbiy qurilmalar va inson-mashina interfeyslari uchun katta istiqbollar ochadi.
Qurilmaning eng muhim afzalligi uning ekologik tozaligidir. Foydalanib boʻlingach, generator tuproqda bir necha hafta ichida parchalanib ketadi yoki suvda erib, tarkibiy qismlarini tabiatga zarar yetkazmasdan qaytaradi. Plastik va ogʻir metallardan xoli boʻlgan ushbu texnologiya "aylanma" elektronika davrini boshlab berishi kutilmoqda.
“Zamin”ni Telegramʻda oʻqing!
