Президентнинг янги қарори қабул қилинди

2024 йил 31 декабрь куни Президентнинг “Мамлакатнинг ижтимоий, сиёсий ва иқтисодий ривожланиш соҳаларидаги стратегик таҳлил ва тадқиқот қилиш фаолиятини самарали ташкил этиш чора-тадбирлари тўғрисида”ги қарори (ПҚ-467-сон) қабул қилинди. Қарор мамлакатнинг стратегик ривожланиш йўналишларини тадқиқ қилиш ва уларни мувофиқлаштириш бўйича муҳим механизмларни жорий этишга қаратилган.

Асосий йўналишлар:
1. Мувофиқлаштирувчи кенгаш ташкил этилди.
Бу кенгаш мамлакатнинг ижтимоий, сиёсий ва иқтисодий ривожланишига оид стратегик таҳлиллар ва тадқиқотлар ўтказиш бўйича ишларни мувофиқлаштирувчи маслаҳат органи ҳисобланади.

2. Мувофиқлаштирувчи кенгашнинг вазифалари:

• Узоқ муддатли стратегик таҳлилий ҳужжатларни ишлаб чиқиш.
  
• Ички ва ташқи сиёсатга оид таклифларни Президентга мунтазам тақдим этиш.
  
• Ички ва ташқи сиёсат соҳаларида тадқиқотларни ташкил қилиш ва мувофиқлаштириш.
  

3. Фаолиятни бошқариш: Мувофиқлаштирувчи кенгашнинг умумий фаолиятини мувофиқлаштириш Президентнинг Махсус топшириқлар бўйича маслаҳатчиси томонидан амалга оширилади.

4. Ишчи гуруҳлар: Қуйидаги йўналишлар бўйича ишчи гуруҳлар ташкил этилди:

• Хавфсизлик ва ижтимоий барқарорлик: Мамлакатнинг барқарорлигига доир масалалар.
  
• Давлат ва жамият қурилиши: Институционал ислоҳотлар ва бошқарув тизими.
  
• Ижтимоий-иқтисодий ривожланиш: Иқтисодиёт ва ижтимоий соҳадаги ислоҳотлар.
  
• Ташқи сиёсат ва халқаро ҳамкорлик: Халқаро муносабатлар ва дипломатия.
  
• Ҳудудларни стратегик режалаштириш ва ривожлантириш: Регионал ривожланиш стратегиялари.
  
• Экологик кун тартиби: Иқлим ўзгариши ва сув тақчиллиги каби глобал масалалар.
  

Бу қарор мамлакатнинг узоқ муддатли манфаатларини илгари суриш ва стратегик ривожланишини таъминлашда муҳим қадам бўлиб хизмат қилади. “Замин” янгиликларини “Telegram”да кузатиб боринг