Фото: Президент матбуот хизмати
Президент Шавкат Мирзиёев Марғилон шаҳрида барпо этилган “Бурҳониддин Марғиноний” илмий-маърифий ва туризм мажмуаси ҳудудидаги янги маданий ҳамда хизмат кўрсатиш объектлари билан танишди. Ушбу лойиҳа нафақат архитектуравий жиҳатдан, балки маънавий ва иқтисодий аҳамияти билан ҳам алоҳида эътиборга лойиқ.
Қайд этилишича, миллий меъморчилик анъаналари, Марғилоннинг бой тарихи ва замонавий туризм талаблари уйғунлашган мазкур мажмуа ҳақиқий “шаҳар ичидаги шаҳар”га айланган. 35 гектар ҳудудни қамраб олган комплексда сайёҳлар учун барча зарур шароитлар яратилмоқда: меҳмонхоналар, карвонсаройлар, савдо ва сервис бинолари, ҳунармандчилик марказлари, миллий бозорлар ва музейлар қуриб битказилган.
Мажмуада буюк аллома Бурҳониддин Марғинонийнинг илмий меросини ўрганиш ва тарғиб қилиш устувор йўналишлардан бири сифатида белгиланган. Шу билан бирга, ҳудудда қадимий ҳунармандчилик анъаналарини сақлаш, зиёрат ва маданий туризмни ривожлантиришга алоҳида эътибор қаратилмоқда.
Лойиҳанинг энг диққатга сазовор жиҳатларидан бири — “Отабек ва Кумуш уйи” музейидир. Бу ерда машҳур “Ўткан кунлар” романи саҳналари деворларда жонлантирилиб, адабиёт ва тарихни бирлаштирган ўзига хос муҳит яратилган. Шунингдек, мақом театри, шоир ва рассомлар хиёбони ҳамда замонавий кутубхона ҳам мажмуа таркибидан жой олган.
Қиймати 1,7 триллион сўмга тенг бўлган ушбу йирик лойиҳа Туркиянинг “Studio Vertebra” компанияси томонидан ишлаб чиқилган бош режа асосида амалга оширилмоқда. Мажмуа икки босқичда барпо этилади. Келгусида бу ерда бизнес марказ, 1500 ўринли масжид, янги меҳмонхоналар, 400 та савдо ва хизмат кўрсатиш нуқталари ҳамда 300 ўринли бозор ташкил этилиши режалаштирилган.
Давлат раҳбари қурилиш ва ободонлаштириш ишларини кўздан кечириб, ҳунармандчилик ва амалий санъат кўргазмалари, бозор расталари билан танишди. Шунингдек, маҳаллий аҳоли ва жамоатчилик вакиллари билан мулоқот қилиб, уларнинг фикр ва таклифларини эшитди.
Мутахассислар таъкидлашича, мажмуа тўлиқ фаолият бошлагач, Фарғона водийсига ҳар йили 200–250 минг нафар хорижий сайёҳ жалб этилиши кутилмоқда. Бу эса 2 мингта янги иш ўрни яратиш, давлат бюджетига 52 миллиард сўм тушум ҳамда 30 миллион долларлик хизматлар экспортини таъминлаш имконини беради.
Шу билан бирга, мазкур тажриба мамлакатнинг бошқа тарихий ҳудудларида ҳам жорий этилиши режалаштирилган. Жумладан, Бухородаги “Боқий Бухоро”, Самарқанддаги Имом Мотуридий мажмуаси атрофи, Қўқондаги Ўрда ва Намангандаги “Ахсикент” ёдгорлиги каби масканларда ҳам шундай лойиҳалар амалга оширилиши кутилмоқда.
Қисқача айтганда, Марғилондаги ушбу мажмуа — бу оддий қурилиш эмас, балки тарих, маданият ва иқтисодни бир нуқтада бирлаштирган стратегик лойиҳа. Энди гап — уни қандай даражада “жонлантириш”да.
