Глобал экологик фонд (ГЭФ) Ўзбекистонда атроф-муҳитни муҳофаза қилишга қаратилган лойиҳалар учун 6,1 миллион АҚШ доллари миқдорида маблағ ажратади. Бу ҳақда Kursiv Uzbekistan хабар берди.
ГЭФ-8 дастури доирасида амалга ошириладиган "Ўзбекистондаги қимматли ландшафтларни комплекс бошқариш ва тиклаш" (EcoLand) лойиҳасининг грант шартномасини имзолаш маросими ва расмий ишга туширилиши CITES иштирокчилари конференцияси доирасида бўлиб ўтди. EcoLand лойиҳасининг асосий мақсади Ўзбекистоннинг учта муҳим ландшафт кластерда экотизимларни тиклаш ва муҳофаза қилишга қаратилган комплекс ёндашувларни кенгайтиришдир.
Бу жараёнда ер ресурсларини барқарор бошқариш, табиатни муҳофаза қилиш, иқлим ўзгаришининг салбий таъсирларини камайтириш ва маҳаллий аҳолини жалб қилиш каби масалалар бирлашган. Миллий қўмита раис ўринбосари Жусипбек Казбековнинг таъкидлашича, “Ўзбекистон ўзининг қимматли ландшафтларини тиклаш ва келгуси авлодлар учун биологик хилма-хилликни сақлашга содиқдир.
Ушбу лойиҳа экологик ислоҳотларимиз йўлида муҳим қадамдир.” Лойиҳа доирасида Ўзбекистоннинг олти вилояти ва ўнта пилот туман қамраб олинади ҳамда мамлакатнинг энг муҳим табиий ландшафтлари ҳимоя қилинади. Ҳудудий лойиҳалар 1,3 миллион гектар майдонда табиий ҳудудларни бошқаришни яхшилаш, уларнинг барқарорлигини ошириш ва маҳаллий аҳоли учун экологик фойдаларга тенг имкониятларни яратишга қаратилган.
EcoLand уч турдаги экотизимлар билан ишлайди ва барча манфаатдор томонларни жалб қилган ҳолда комплекс бошқарув механизмларини жорий этади. Шунингдек, биохилма-хилликни молиялаштириш механизмларини, жумладан инновацион молиявий воситаларни синовдан ўтказади.
Лойиҳа доирасида "яшил" инвестиция маҳсулотлари ва биохилма-хиллик кредитлари қўлланилади. Аёллар, ёшлар ва заиф гуруҳларни қарор қабул қилиш жараёнига жалб этишга алоҳида эътибор қаратилади.
Тадбир доирасида Миллий экология қўмитаси ва БМТ Тараққиёт дастури (UNDP) ўртасида EcoLand лойиҳасини биргаликда амалга ошириш бўйича ният баённомаси имзоланди. Тақдимотда Ўзбекистондаги экологик ислоҳотлар, жумладан, экологик бошқарувни яхшилаш, деградацияга учраган ҳудудларни тиклаш, биологик хилма-хилликни муҳофаза қилиш ва сув ҳамда ер ресурсларини барқарор бошқариш бўйича амалга оширилаётган чора-тадбирлар ҳақида маълумот берилди.
UNDP томонидан ERIP лойиҳаси доирасида асосий биологик ҳудудларни тиклаш, табиатга асосланган туризмни ривожлантириш ва гендер жиҳатларини ҳисобга олган ҳолда маҳаллий жамоаларни қўллаб-қувватлаш механизмларини жорий этиш бўйича амалга оширилаётган ташаббуслар намойиш этилди.
Меҳмон гуруҳидаги фойдаланувчилар ушбу мақолага изоҳ қолдира олмайди.
