Chevrolet Onix хавфсизлик можароси туфайли катта жаримага тортилиши мумкин

Бразилияда Chevrolet Onix автомобиллари билан боғлиқ можаро авж олмоқда, деб daily-motor.ru хабар бермоқда. General Motors компаниясига 2012-2018 йилларда мамлакатда 1 миллиондан ортиқ хавфсиз бўлмаган автомобилларни сотгани учун жарима солиниши мумкин.

Бразилия Федерал прокуратураси General Motors’ни автомобил эгалари олдида жавобгар қилишни талаб қилмоқда. Агар суд даъвони қўллаб-қувватласа, жабрланганларга 500 миллион АҚШ доллари миқдорида компенсация тўланиши керак бўлади.

Ишнинг асосий жиҳати шундаки, Chevrolet Бразилия бозорига мўлжалланган Onix моделларини қўшимча хавфсизлик ҳимоясисиз сотгани, аммо экспорт учун ишлаб чиқарилган автомобилларга қўшимча ҳимоя плиталарини ўрнатгани айтилмоқда.

2017-йилда Latin-NCAP мустақил ташкилоти томонидан ўтказилган краш-тест натижаларига кўра, Chevrolet Onix ён томондан урилиш тестида нол балл олган. Шу сабабли 2020-йилда компанияга қарши судга мурожаат қилинган.

General Motors эса Latin-NCAP ташкилоти ҳукумат томонидан тартибга солинадиган орган эмаслигини ва унинг натижалари расмий хавфсизлик стандартлари эмаслигини таъкидламоқда.

Бразилия бозоридаги бошқа машҳур моделлар ҳам ўхшаш паст хавфсизлик баҳоларига эга бўлган:
* Renault Sandero, Renault Logan, Hyundai HB20,
* Citroen C3, Citroen C3 Aircross, Ford Ka, Fiat Argo.

Бироқ, прокуратура айнан Chevrolet’ни нишонга олган, гарчи компания Onix модели ишлаб чиқарилган даврда у Бразилиянинг расмий хавфсизлик талабларига жавоб берганини таъкидлаган бўлса ҳам.

Қизиғи шундаки, можаро бошланганидан кейин Chevrolet Бразилия бозоридаги Onix моделларига ҳам экспорт автомобилларида мавжуд бўлган қўшимча хавфсизлик ҳимоясини ўрнатди.

General Motors раҳбарияти эса суд жараёни давом этаётганлиги сабабли изоҳ беришдан бош тортди.

Янгиликлар