Бугун, 29 июль куни Хоразм вилоятининг Урганч шаҳрида инсонни ларзага соладиган ҳолат рўй берди. Аёл фуқаро кўп қаватли уйнинг 9-қаватидаги том қисмига чиқиб, ўз жонига қасд қилишга уринаётгани аниқланди.
Ҳодисадан хабардор бўлган фуқаролар зудлик билан ҳуқуқни муҳофаза қилувчи органларга, ёнғин-қутқарув хизмати ва тез тиббий ёрдам хизматига мурожаат қилишди. Тезкорлик билан етиб келган махсус хизматлар аёл билан мулоқот ўрнатиб, уни тинчлантиришга ҳаракат қилишди.
Психологлар ва қутқарувчиларнинг ҳамкорликдаги ҳаракатлари натижасида у кўндирилди ва хавфсизлик чоралари кўрилган ҳолда пастга туширилди. Тиббий кўрикдан ўтказилган аёл ҳозирда шифокорлар назоратида.
Айни вақтда ҳодиса юзасидан тергов ҳаракатлари олиб борилмоқда. Дастлабки маълумотларга кўра, аёл шахсий муаммолар ва турмуш босими сабаб шундай қадамга боришга қарор қилган бўлиши мумкин.
Мутасаддилар аҳолини ўзаро эътиборли бўлишга ва руҳий ҳолати издан чиққан инсонларга нисбатан нафақат ёрдам, балки тушуниш билан ёндашишга чақирмоқда.
«Замин»ни Telegram’да ўқинг!
