АҚШ президенти Доналд Трамп Россия президенти Владимир Путинга янада аниқ ва қисқа муҳлат белгилади — энди Москвада урушни якунлаш учун фақат 10 кун бор. Бу ҳақда Трамп матбуот вакиллари билан мулоқот чоғида маълум қилди, деб хабар берди Оқ үй расмийлари.
Трамп ўз сўзларида, агар яқин 10 кун ичида тинчлик келишувига эришилмаса, АҚШ Россияга нисбатан янги божлар ва иккиламчи санкцияларни жорий этишини таъкидлади. Унинг таъкидлашича, бу чоралар Россия иқтисодиётига қандай таъсир қилиши аниқ эмас, аммо Вашингтон энди кескин ва қатъий позицияда турибди. “Божлар ва санкциялар Россияга таъсир қиладими ёки йўқми — билмайман. Путиннинг урушни давом эттириш нияти борлиги кўриниб турибди, аммо биз ўз йўлимиздан қайтмаймиз”, — деди Трамп.
Трамп саноқли кунларда санкция ва иқтисодий чекловларни жорий этиш эҳтимолини алоҳида қайд этди. Бу жараён бошланиши билан хомашё бозорларида қандай ўзгаришлар бўлиши уни “хавотирга солмаслигини” қўшимча қилди. АҚШ президенти бу муҳлат бугундан бошланишини, Россия эса 10 кун ичида аниқ қарор қабул қилиши зарурлигини айтиб ўтди.
28 июл куни Доналд Трамп Россия ва Украина ўртасида тузилаётган келишувлар бўйича ҳам ўз фикрини билдириб, Истанбулдаги музокаралардан норози эканини, олдинга силжиш кузатилмаётганини айтди. Шу сабабли, Россия билан бизнес алоқаларини давом эттираётган давлатлар ҳам янги санкцияларга дуч келишлари мумкинлигини таъкидлади.
Эслатиб ўтамиз, Трамп илгари 14 июл куни ҳам Россияга 50 кунлик муҳлат белгилаган, шу билан бирга Украинага янги қуроллар етказиб бериш бўйича ваъда берган эди. У нима учун бунақа аниқ муддат қўйганини изоҳлаб ўтмади, аммо энди бу муҳлат 10 кунга қисқартирилди.
Дунё жамоатчилиги эса, Вашингтоннинг яқин кунлардаги қадамлари, Москва ва Киев ўртасида уруш тўхтатилиши борасида қандай воқеалар ривож топишини қизиқиш билан кузатмоқда. Трампнинг кескин баёнотлари халқаро сиёсий майдонда янги босим ва мураккаб саволларни келтириб чиқармоқда.
«Замин»ни Telegram’да ўқинг!
