Жиноят содир этгани учун қидирувга берилган фуқаро И.Х. пойтахт Тошкент шаҳрида ҳуқуқни муҳофаза қилувчи органлар томонидан қўлга олинди. Бу ҳақда Наманган вилояти ИИБ Ахборот хизмати маълум қилди.
Маълумотларга кўра, 1987 йилда туғилган ва Наманган вилоятининг Мингбулоқ туманидаги “Кичик Жомашуй” маҳалласида яшовчи И.Х. жорий йилнинг 8 июль куни ўтказилган “Қидирув” тадбирлари доирасида Тошкент шаҳар Олмазор туманида аниқланиб, ҳибсга олинган.
Унга нисбатан Ўзбекистон Республикаси Жиноят кодексининг 169-моддаси 1-қисми (ўғрилик) бўйича жиноий иш қўзғатилган ва у муддатидан аввал терговдан қочганлиги сабабли қидирувга берилган эди.
Тошкент шаҳридаги тинимсиз суриштирувлар самарасида И.Х. ни ушлашга муваффақ бўлинди ва у белгиланган тартибда Мингбулоқ туман Ички ишлар бўлимига топширилди.
Ҳуқуқни муҳофаза қилувчи органлар бу каби ҳолатларда жиноят содир этган шахслар қанчалик кўп вақт ўтмасин, албатта қонун олдида жавоб беришини таъкидлашмоқда.
«Замин»ни Telegram’да ўқинг!
