Косово ва Швейцария дуранг натижа қайд этди

Косово ва Швейцария терма жамоалари Приштина шаҳрида бўлиб ўтган ўйинда 1:1 ҳисобига дуранг ўйнади. Ушбу натижа билан Швейцария гуруҳда биринчи ўринни сақлаб қолди ва жаҳон чемпионатига тўғридан-тўғри йўлланма олди, Косово эса иккинчи ўринни эгаллаб, плей-офф босқичида қатнашиш ҳуқуқини қўлга киритди.

Ўйин бошидан ҳар икки жамоа эҳтиёткорона ҳаракат қилди. Швейцария тўпни назорат қилишда устунликка эга бўлса-да, ҳужумларни тезлаштиришга шошилмади.

Меҳмонлар тўпни асосан Жака ва ҳимоячилар орқали тарқатишди, олдинги чизиқда ортиқча хавф-хатардан қочишди. Косово эса Муслия ва Войвода орқали қанотдан ҳаракат қилди, аммо жарима майдони ичида кескинлик яратолмади.

Биринчи хавфли вазиятни Швейцариялик Эбишер яратди, аммо унинг яқин масофадан берган зарбасини дарвозабон Мурич муваффақиятли қайтарди. Косово эса ўзининг биринчи аниқ зарбасини биринчи бўлим охирида амалга оширди, лекин Ходжанинг уринишини дарвозабон Кобел осонгина ушлади.

Иккинчи бўлим бошида ўйин жонланди. 47-дақиқада Швейцария рақибнинг қанотдаги хатосидан фойдаланди.

Соув марказда тўпни қабул қилиб, Варгасни чап қанотдан жарима майдонига узатма билан чиқарди. Варгас эса дарвозабон Мурични алдаб, яқин бурчакка аниқ зарба йўллаб ҳисобни очди.

Ушбу голдан сўнг Косово фаолликни оширди ва ўйинни рақиб жарима майдони яқинига кўчирди. Муслия ва Галапени чап қанот орқали бир неча бор тўпни жарима майдонига узатиб, Муриқини тўп билан таъминлашга ҳаракат қилишди.

Ниҳоят, 74-дақиқада Муслия жарима майдони чизиғи яқинида тўпни қабул қилиб, ўнг бурчакка аниқ зарба йўллади ва ҳисобни тенглаштирди. Қолган дақиқаларда Косово ғалабага эришишга ҳаракат қилди, аммо Швейцария ҳимояси дуранг натижани сақлаб қолди.

Бу натижа иккала жамоани ҳам қониқтирди. Швейцария гуруҳда биринчи ўринни эгаллаб, жаҳон чемпионатига йўлланма олди.

Косово эса иккинчи ўринни банд этиб, плей-офф босқичида иштирок этади. “Zamin”ни Telegram'да ўқинг!