Нигериянинг Квара штатидаги Эруку чегара шаҳрида қуролланган шахслар маҳаллий черковга ҳужум қилиб, икки кишини ўлдирди. Гувоҳларнинг сўзларига кўра, 18-ноябрь куни кечқурун бир гуруҳ қуролли эркаклар шаҳар четига бостириб кириб, тартибсиз ўқ уза бошлаган.
Маҳаллий аҳоли ҳужумчилар тезкор ҳаракат қилганини ва яхши қуролланганини таъкидлашмоқда. Қўрқувдан одамлар яқин атрофдаги ўрмонларга қочиб кетишган.
Шаҳарнинг бир фуқароси берган маълумотга кўра, бандитлар икки кишини жойида ўлдирган ва бир неча кишини ўзлари билан олиб кетган. Аммо айнан қанча одам ўғирланганлиги ҳозирча номаълум.
Бошқа аҳоли вакиллари Эрукуда охирги уч ҳафта давомида доимий ҳужумлар бўлаётганини қайд этишмоқда. Квара штати полицияси ҳодиса жойига тезкор кучларни юборганини ва бандитларни чекинишга мажбур қилганини билдирди.
Полиция текширув жараёнида маҳаллий черков ичида бир эркакнинг жасадини ва яна бир жасадни яқин атрофдаги ўрмонда топган. Маҳаллий ўз-ўзини ҳимоя қилиш гуруҳининг бир аъзоси ўқдан жароҳат олиб, Эруку шифохонасида даволанмоқда.
Квара штати губернатори Абдураҳмон Абдураззоқ ҳужумни қоралади ва чегарадош ҳудудларда хавфсизлик чораларини кучайтиришни буюрди. У ҳалок бўлганларнинг оилаларига ҳамдардлик билдириб, ҳукумат вазиятни барқарорлаштириш учун ҳаракат қилишда давом этишини таъкидлади.
Шунингдек, у яқинда Нигерия ҳукуматининг ҳудуд хавфсизлигини мустаҳкамлаш мақсадида қарийб 900 ҳарбийни Квара штатига жўнатганини эслатиб ўтди. Мазкур ҳужум Кеббида 26 нафар мактаб ўқувчисининг ўғирланишидан бир неча кун ўтиб содир бўлди.
Уларнинг икки нафари қочишга муваффақ бўлган, аммо мактаб директорининг ўринбосари ҳужумда ҳалок бўлган. Бундан олдин АҚШ президенти Дональд Трамп Нигерия ҳукуматини маҳаллий христианларни исломий жангариларнинг ҳужумларидан ҳимоя қила олмаётганликда айблаган ва бу давлатга қўшин юбориш билан таҳдид қилган эди. Уни машҳур реппер Ники Минаж ҳам қўллаб-қувватлаган.
Меҳмон гуруҳидаги фойдаланувчилар ушбу мақолага изоҳ қолдира олмайди.
