Россия Марказий банки 8 декабрдан бошлаб Россия фуқаролари ва дўст давлатлар фуқаролари учун хорижга пул ўтказиш чекловлари бекор қилинишини эълон қилди. Регуляторнинг маълум қилишича, бундай қарор валюта бозоридаги барқарор вазият сабабли қабул қилинган.
Марказий банк маълумотига кўра, 2026 йил 7 июнгача чекловлар фақат дўст бўлмаган давлатлардан келган ва Россияда ишлаётган норезидентларга нисбатан сақланиб қолади. Уларга фақат ўз иш ҳақи миқдорида маблағни хорижга юборишга рухсат берилади.
Россияда ишламаётган ва дўст бўлмаган давлатлардан бўлган норезидентлар, шунингдек, ушбу давлатлардан бўлган компаниялар учун тўлиқ тақиқ амалда қолади. Бироқ, Россия фуқаролари томонидан назорат қилинадиган юридик шахслар бундан мустасно.
Марказий банк хорижий инвесторларнинг Россия молиявий бозорида жойлаштирилган маблағлари ва 'Ин' туридаги ҳисоб рақамларидан хорижга ўтказмаларни амалга оширишга чекловлар тааллуқли эмаслигини аниқлаштирди. Шунингдек, дўст бўлмаган давлатларнинг банкларига, агар юборувчи ва қабул қилувчи ҳисоб рақамлари хорижий кредит ташкилотларида жойлашган бўлса, Россиядаги банкларда очилган корреспондент ҳисоблари орқали рублда ўтказмаларни амалга ошириш имконияти сақланиб қолади.
Меҳмон гуруҳидаги фойдаланувчилар ушбу мақолага изоҳ қолдира олмайди.
