Rossiya Markaziy banki 8 dekabrdan boshlab Rossiya fuqarolari va do‘st davlatlar fuqarolari uchun xorijga pul o‘tkazish cheklovlari bekor qilinishini e’lon qildi. Regulyatorning ma’lum qilishicha, bunday qaror valyuta bozoridagi barqaror vaziyat sababli qabul qilingan.
Markaziy bank ma’lumotiga ko‘ra, 2026 yil 7 iyungacha cheklovlar faqat do‘st bo‘lmagan davlatlardan kelgan va Rossiyada ishlayotgan norezidentlarga nisbatan saqlanib qoladi. Ularga faqat o‘z ish haqi miqdorida mablag‘ni xorijga yuborishga ruxsat beriladi.
Rossiyada ishlamayotgan va do‘st bo‘lmagan davlatlardan bo‘lgan norezidentlar, shuningdek, ushbu davlatlardan bo‘lgan kompaniyalar uchun to‘liq taqiq amalda qoladi. Biroq, Rossiya fuqarolari tomonidan nazorat qilinadigan yuridik shaxslar bundan mustasno.
Markaziy bank xorijiy investorlarning Rossiya moliyaviy bozorida joylashtirilgan mablag‘lari va ’In’ turidagi hisob raqamlaridan xorijga o‘tkazmalarni amalga oshirishga cheklovlar taalluqli emasligini aniqlashtirdi. Shuningdek, do‘st bo‘lmagan davlatlarning banklariga, agar yuboruvchi va qabul qiluvchi hisob raqamlari xorijiy kredit tashkilotlarida joylashgan bo‘lsa, Rossiyadagi banklarda ochilgan korrespondent hisoblari orqali rublda o‘tkazmalarni amalga oshirish imkoniyati saqlanib qoladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
