Ўзбекистонда энг юқори даромадга эга бўлган жисмоний шахслар учун солиққа тортишнинг янги тизими ишлаб чиқилмоқда. Бу ҳақда 1 апрель куни Ахборот ва оммавий коммуникациялар агентлигида ўтказилган матбуот анжуманида Солиқ қўмитаси раисининг биринчи ўринбосари Мубин Мирзаев маълум қилди.
Даромадга эга аҳоли ва янги тизим
Ҳозирги кунда мамлакат аҳолиси қарийб 38 миллион кишини ташкил этади. Шундан 18 миллиондан ортиқ фуқаро даромадга эга бўлиб, солиқ тўловчи сифатида қайд этилган. Янги тизим айнан ушбу тоифадаги аҳолини сегментлаш орқали энг юқори даромадли шахслар учун махсус солиқ тўлаш ва ундириш тартибини жорий этишни назарда тутади.
Мубин Мирзаевнинг таъкидлашича, бой фуқароларнинг тўлиқ базаси шакллантирилади ва бу орқали солиқдан қочишнинг олди олинади. Ушбу тизим жисмоний шахсларнинг ўз даромадларини сунъий равишда камайтириш ёки яшириш эҳтимолини йўққа чиқаради.
Электрон тизим ва хорижий даромадлар
Янги солиқ тизимини тўлиқ ишлаб чиқиш учун Солиқ қўмитасига тахминан бир йил вақт талаб этилади. Ушбу тизим нафақат Ўзбекистонда олинган даромадларни, балки хорижда топилган маблағларни ҳам солиққа тортишни ўз ичига олади.
Шунингдек, Ўзбекистон резиденти чет элда даромад топган тақдирда, мамлакатда солиқ тўлаши шарт бўлади. Норезидентлар билан боғлиқ ҳолларда эса Солиқ қўмитаси икки томонлама солиққа тортишнинг олдини олиш мақсадида хорижий давлатда тўланган солиқларни ҳисобга олади.
Янги тизимдан кутилаётган натижалар
Янги солиқ тизими орқали давлат бюджетига қўшимча маблағлар жалб этилиши ва иқтисодиётда шаффофликни ошириш кутилмоқда. Шу билан бирга, юқори даромадли шахслар учун қўшимча мажбуриятлар юклатилиши эҳтимоли ижтимоий тармоқларда ва жамоатчилик ўртасида қизғин муҳокамаларга сабаб бўлиши мумкин.
Солиқ ислоҳотларининг қанчалик самарали бўлиши, улар амалга оширилгандан кейин аниқ маълум бўлади. Ҳозирча эса ҳукумат ушбу янги тизимни пухта тайёрлаш ва унинг самарадорлигини таъминлаш устида иш олиб бормоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
