Жаҳон чемпионати футбол оламининг энг шарафли ва нуфузли мусобақаси сифатида тан олинади. Дунё бўйлаб миллионлаб ишқибозлар ҳар тўрт йилда ана шу мусобақани сабрсизлик билан кутади. Терма жамоалар учун эса мундиалда қатнашиш — орзу эмас, балки ўз йўлини тасдиқлайдиган энг катта марра. Бу йил Ўзбекистон футбол тарихи учун ўчмас саҳифа ёзилди — миллий терма жамоамиз илк бор жаҳон биринчилиги йўлланмасига эга чиқди.
Энди эса барча интиқлик билан кутаётган босқич — қуръа ташлаш маросими яқин. Қуръа жараёни нафақат жамоанинг келгуси рақибларини белгилайди, балки бизни мундиалдаги биринчи қадамлар қандай руҳда бошланиши ҳақида ҳам маълум тасаввур беради.
Ўзбекистон терма жамоасининг собиқ ҳимоячиси, тажрибали мутахассис Даврон Файзиев ҳам ушбу қаҳрамонлик йўли, кутилмалар ва эҳтимолий рақиблар ҳақида ўз мулоҳазаларини билдирди.
"Ҳамма қатори мен ҳам қуръа ташлаш маросимини катта ҳаяжон билан кутяпман. Ростини айтсам, жамоамизга Аргентина, Англия, Гана ёки Сенегал тўғри келишини истардим. Чунки биз кучли жамоалар билан рақобат қилишдан қўрқмаслигимизни кўрсата олдик. Жаҳон чемпионатига тасодифан чиққанимиз йўқ — бу меҳнат, ишонч ва ўзимизни намойиш қилиш натижаси. Шу боис, кучли рақиблар чиқишидан қочиш керак деб ўйламайман. Аксинча, муносиб рақиблар бўлсин", – деди Файзиев.
Унинг фикрларига кўра, Ўзбекистон учун бу мусобақа нафақат дебют, балки ўз салоҳиятини жаҳонга намоён қилиш имконияти ҳамдир. Соғлом рақобат, кучли жамоаларга қарши майдонга тушиш — футболчилар учун ҳам, бутун мамлакат учун ҳам катта руҳий тажриба.
Эслатиб ўтамиз, қуръа ташлаш маросими бугун Тошкент вақти билан 22:00 да старт олади. Миллионлаб юртдошлар ушбу дақиқаларни катта интизорлик билан кутмоқда.
Ўзбекистон футбол тарихида янги бўлим очилаётган бу кунларда эса битта ҳиссиёт умумий: ишонч, ғурур ва янги чўққиларга интилиш.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
