2026 йилги Жаҳон чемпионати гуруҳ босқичи қуръаси олдидан АҚШ Президенти Доналд Трамп учун мутлақо кутилмаган, бироқ нуфузли ҳам бўлган янгилик тасдиқланди. The Athletic'нинг ёзишича, Трамп махсус равишда таъсис этилган ФИФА Тинчлик мукофоти билан тақдирланади. Ушбу мукофот тарихда илк бор топширилаётгани билан ҳам аҳамиятли — демак, унинг биринчи соҳиблиги айнан Трампга насиб этди.
Маълум қилинишича, 5 декабрь куни қуръа ташлаш маросими давомида АҚШ етакчисига нутқ сўзлаш учун ҳам алоҳида вақт ажратилади. Бу эса мундиал олдидан сиёсий ва спорт дунёси бир вақтда бир нуқтада туташадиган камдан-кам ҳолатлардан бири бўлади.
Тинчлик мукофоти 2025 йил ноябр ойида жорий этилган бўлиб, ФИФА ташаббуси сифатида халқаро ҳамжиҳатликни мустаҳкамлаш ва спорт орқали глобал тинчлик ғояларини тарғиб қилишни мақсад қилади.
Шу ўринда эслатиб ўтиш жоизки, 2026 йилги Жаҳон чемпионати спорт тарихида мутлақо янги форматда ўтади — мундиал илк бор уч давлатда: АҚШ, Канада ва Мексика ҳудудида бир вақтда ташкил этилади. Мусобақада 48 та миллий терма жамоа иштирок этади, бу эса турнирни янада кўламли ва рақобатбардош қилади.
Йирик мусобақа 2026 йил 11 июндан 19 июлгача давом этади ва фанатлар учун том маънода катта футбол байрамига айланиши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
