Ўзбекистонда замонавий омборларни ривожлантириш мақсадида Марказий Осиёдаги илк инвестиция фондлари ташкил этилади. Алматида бўлиб ўтган Central Asia Warehouse Summit (CAWS 2025) форумида IBC Global компанияси умумий ҳажми $250 миллиондан ошадиган икки фондни ишга туширишини эълон қилди.
Биринчи фонд – Eurasian Warehouse REIT OEIC Ltd. – TG Global (Tansar Capital Group) иштирокида ташкил этилади.
Ушбу фонд $75 миллион йиғишни мақсад қилган бўлиб, кутилаётган даромадлилик 18-22% ни ташкил этади, инвестиция муддати 6+2 йил. Фонд асосан Қозоғистон (70%) ва Ўзбекистон (14%) бозорларига йўналтирилади ва тахминан 85 минг квадрат метр майдонда тайёр ҳамда янги объектлардан иборат портфель шакллантиради.
Иккинчи фонд – Central Asia Warehouse PEF OEIC Ltd. – Provident Fiduciary Ltd ва Roemer Silk Road иштирокида ташкил қилинади. Унинг ҳажми $200 миллион бўлиб, даромадлилик 15% дан юқори, инвестиция муддати эса беш йилни ташкил этади.
Фонднинг портфели қарийб 500 минг квадрат метрни ташкил этади, шундан 55% янги объектлар бўлади. Асосий инвестиция йўналишлари Ўзбекистон (40%), Қозоғистон (30–35%) ва минтақанинг бошқа давлатларига қаратилади.
Иккала фонд ҳам «Астана» халқаро молия марказида (AIFC) рўйхатга олинган.
