31 октябрдан 7 ноябрга қадар Республика фонд биржаси (РФБ) «Тошкент»да рўйхатга олинган акцияларнинг аксарияти салбий динамикани кўрсатди. UCI фонд индекси 4,28 фоизга пасайди.
Ушбу даврда энг катта ўсишни «Ўзпромстройбанк» акциялари (+7,96%) қайд этди. Шунингдек, «Ўзбектелеком» (+5,80%) ва «Ўзбекинвест» (+5,28%) акциялари ҳам ўсиш кўрсатди.
Бироқ, «Қизилқумцемент» акциялари 5,82 фоизга тушиб, ҳафта давомида энг катта йўқотишни қайд этди. Бундан ташқари, UzAuto Motors (-5,14%) ва «Бизнес ривожланиш банки» (-5%) акциялари ҳам арзонлашди.
Ҳафта давомида 9 та юқори ликвидли акция ижобий натижа билан якунланган бўлса, 20 таси салбий кўрсаткичга эга бўлди. Эслатиб ўтамиз, ўтган ҳафта РФБ «Тошкент»даги UCI фонд индекси 0,33 фоизга ўсган эди.
Ўшанда «Ўзбекгеофизика» акциялари 13,11 фоизга қимматлашиб, энг катта ўсишни қайд этган эди. Шунингдек, «Ўзбекнефтгаз» (+8,41%) ва UzAuto Motors (+7,22%) акциялари ҳам ўсиш намойиш қилган эди.
