Meta компанияси сунъий интеллект соҳасида яна бир йирик қадам ташлади. Технологик гигант Сингапурда фаолият юритувчи Manus стартапини сотиб олди. Келишувнинг аниқ қиймати ошкор этилмаган, бироқ бу харид жаҳон IT бозорида катта қизиқиш уйғотмоқда.
Манус стартапи жуда қисқа вақт ичида — атиги саккиз ой давомида — 100 миллион доллар даромад олишга муваффақ бўлгани билан алоҳида эътиборга тушган. Компания инсон иштирокисиз мустақил равишда мураккаб вазифаларни бажара оладиган автоном сунъий интеллект агентларини яратишга ихтисослашган.
Мутахассислар фикрича, ушбу технология Марк Цукербергнинг стратегик қарашларига тўлиқ мос келади. Meta раҳбари бир неча бор келажакда ҳар бир бизнес, кичик ёки йирик бўлишидан қатъи назар, ўз шахсий сунъий интеллект агентига эга бўлишини таъкидлаб келган.
Манус томонидан ишлаб чиқилган автоном АИ ечимлари компанияларга мижозлар билан ишлаш, ички жараёнларни автоматлаштириш, таҳлил ва қарор қабул қилиш каби соҳаларда инсон омилини кескин камайтириш имконини беради. Бу эса бизнес самарадорлигини ошириш билан бирга харажатларни ҳам қисқартиришга хизмат қилади.
Таҳлилчиларнинг баҳолашича, Meta’нинг Манусни харид қилиши сунъий интеллект бозорида рақобатни янада кучайтиради. Айниқса, автоном АИ агентлар йўналиши яқин йилларда энг тез ривожланадиган сегментлардан бирига айланиши кутилмоқда.
Қисқаси, Meta бу харид орқали келажак технологияларига тикканини очиқ намоён қилди. Энди эса савол битта: Манус ечимлари Meta экотизимида қай даражада тез ва самарали жорий этилади? Вақт бу саволга аниқ жавоб беради.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
