Ўзбекистон футзал терма жамоаси Россияга қарши ўртоқлик учрашувида характер ва жанговорлик намоён этди. Қизиқарли ва кескин кечган беллашув якунида вакилларимиз 3:2 ҳисобида ғалабани қўлга киритди ва мухлисларини хурсанд қилди.
Учрашувнинг дастлабки дақиқаларида ташаббус россияликлар томонида бўлди. Антон Соколов ҳамда Григорий Валеев киритган голлар орқали меҳмонлар ҳисобда олдинга чиқиб олди. Бироқ бу ҳолат ўзбекистонлик футзалчиларни тўхтатиб қўймади, аксинча, жамоа янада фаол ўйин намоён этишга ўтди.
Орадан кўп ўтмай Музаффар Аҳаджоновнинг аниқ зарбаси ҳисобни қисқартирди. Кейин эса Шахрам Фаҳриддинов ўз голи билан мувозанатни тиклаб, ўйинга интрига қайтарди. Бу дақиқаларда майдондаги кураш янада шиддатли тус олди, ҳар икки жамоа ғалаба учун бор кучини ишга солди.
Беллашув тақдири сўнгги дақиқаларда ҳал бўлди. Акбар Усмонов ҳал қилувчи голни киритиб, Ўзбекистон терма жамоасига ғалаба олиб келди. Ушбу гол нафақат таблода ҳисобни ўзгартирди, балки жамоанинг иродаси ва тайёргарлиги қай даражада эканини ҳам яққол кўрсатди.
Эслатиб ўтамиз, Ўзбекистон ва Россия футзал терма жамоалари ўртасидаги навбатдаги ўртоқлик учрашуви 21 декабрь куни бўлиб ўтади. Демак, мухлисларни олдинда яна бир қизиқарли беллашув кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
