2026 йил январ ҳолатига кўра, Ўзбекистонда бир пиёла капучинонинг ўртача нархи 1,9 доллар атрофида. Бу рақам минтақада қаҳва ичишни яхши кўрадиганлар учун қизиқ сигнал: Қозоғистонда ўртача 2,2 доллар, Россияда эса 2,6 доллар. Яъни, оддий бир капучино масаласида ҳам Ўзбекистон ҳозирча нисбатан “енгилроқ” нархни ушлаб турибди.
Бироқ фон жуда “ширин” эмас. Таҳлилларда таъкидланишича, 2025 йилда қаҳва етиштирувчи йирик давлатлар иқлим зарбасини қаттиқ ҳис қилди. Арабиканинг асосий етказиб берувчиси бўлган Бразилияда кучли қурғоқчилик кузатилди. Вьетнамда эса ғайриоддий иссиқ робуста ҳосилининг бир қисмини “ёқиб юборди”, десак ҳам бўлади. Бу икки омил бозорга бир вақтнинг ўзида таъсир қилди: таклиф қисқарди, хавотир эса кучайди.
Натижада қаҳва хомашёси бўйича жаҳон биржа нархлари бир йил ичида 28 фоизга ўсиб, бир фунт қаҳва қиймати 4,1 долларга етди. Мутахассислар талаб ўсиши тўхтамаяпти, деган фикрда: кофехоналар сегменти кенгаймоқда, уйда кофе тайёрлаш маданияти ҳам кучаймоқда. Шу сабаб нархларга босим сақланиб туриши мумкин.
Шундай бўлса-да, ҳозирча Ўзбекистон истеъмолчилари учун вазият Қозоғистон ва Россияга нисбатан қулайроқ кўринаяпти. Лекин глобал бозорда “иссиқ ҳаво” давом этса, бу фарқни сақлаб қолиш қийинлашиши мумкин. Қисқаси: капучино ҳозирча арзон, лекин тренд шундайки, қаҳва нархига “танаффус” берилишига ишониш эртароқ.
“Zamin”ни Telegram'да ўқинг!
