Каталониянинг «Барселона» клуби Мисрнинг «Ал Аҳли» жамоаси тарбияланувчиси бўлган 18 ёшли ҳужумчи Ҳамза Абдулкарим билан дастлабки келишувга эришди. Энди «кўк-анорранглилар» трансферни расмийлаштириш учун тўғридан-тўғри мисрликлар билан музокараларни давом эттирмоқда.
Қайд этилишича, Абдулкарим Миср ўсмирлар терма жамоасидаги ишончли ўйини, ҳаракатчанлиги ва жамоага тез мослаша олиши билан скаутлар эътиборини тортган. Ёш форвард жамоавий ўйинда ҳам фойдали: майдонда тўғри позиция танлайди, тезлик қўшади ва рақиб ҳимоясини доимий босимда ушлаб туради.
Айниқса, ўтган йил ноябр ойида бўлиб ўтган U-17 жаҳон чемпионатидаги кўрсаткичлари унинг потенциалини янада очиб берди: у 4 та учрашувда қатнашиб, 2 та гол ва 1 та голли узатма қайд этган. Аввалроқ Ҳамзанинг ўзи ҳам эҳтимолий трансферга қизиқиш билдиргани ҳақида маълумотлар тарқалган эди.
Энди барча диққат клублар ўртасидаги келишув қандай якун топишига қаратилган. Агар музокаралар муваффақиятли тугаса, «Барселона» яна бир ёш ва истиқболли ҳужумчини ўз лойиҳасига қўшиб олиши мумкин — мухлислар эса янги номнинг катта саҳнага қандай кириб келишини қизиқиш билан кутади.
“Zamin”ни Telegram'да ўқинг!
