Тошкент шаҳрида қарзини сохта АҚШ долларлари билан “ёпиб қўйиш”га уринган шахс қўлга олинди. Бу ҳақда Иқтисодий жиноятларга қарши курашиш департаменти расмий маълумот берди.
Маълум бўлишича, муқаддам судланган Р.Т. таниши М.Х.нинг ишончини қозониб, унга 4 тонна помидор етказиб беришни ваъда қилган. Шу келишув асосида М.Х. унга 4 минг доллар берган. Аммо гумонланувчи ушбу маблағни маҳсулотга эмас, шахсий эҳтиёжларига сарфлаб юборгани айтилади.
Кейинчалик пулни қайтармаслик ва вазиятдан “йўл топиш” мақсадида Р.Т. 100 долларлик қалбаки купюралардан жами 4 минг доллар тайёрлаб, қарзни шу тарзда тўлашга ҳаракат қилган. Бироқ сохта пулларни топшириш жараёнидаёқ ҳолат фош этилиб, гумонланувчи ашёвий далиллар билан ушланган.
Ҳолат юзасидан Жиноят кодексининг фирибгарлик ҳамда қалбаки пул ва қимматли қоғозларни тайёрлаш ва муомалага киритишга оид моддалари асосида жиноят иши қўзғатилган. Айни пайтда тергов ҳаракатлари давом этмоқда.
