Италияда кун ўйинлари: «Наполи» инқирозда, «Аталанта» — скудетто учун пойгага қайтди (видео)

Якшанба оқшомида Италия футболида рўй берган асосий воқеалар, ўйинлардаги голлар ва турнир жадвалидаги вазият бўйича муҳим маълумотлар билан мазкур мақола орқали билиб оласиз.

«Комо» — «Наполи» 2:1
Голлар: Рраҳмани (7, автогол), Диао (77) — Распадори (17).
«Комо» — Бюте, Валле, Кемпф, Голданига, Смолчич, Пас (Дувикас, 90), Стрефецца (Войвода, 90), Да Куня (Энгелҳардт, 81), Перроне, Какре (Кутроне, 72), Диао (Фадера, 81).
«Наполи» — Мерет, Буонжорно, Рраҳмани, Ди Лоренцо, Спинаццола, Мактоминей, Лоботка (Окафор, 84), Биллинг (Замбо-Ангисса, 62), Политано (Нгонж, 77), Распадори, Лукаку (Симеоне, 62).
Огоҳлантиришлар: Пас (24), Ди Лоренцо (68), Мактоминей (83), Симеоне (87).

Бир кун олдин «Милан» дарвозабони Менян тўпни ўз жамоадоши Тшауга қарата тепиб, кулгили автоголга ҳаммуаллифлик қилганди. Бир кун ўтиб «Наполи» ҳимоячиси Рраҳмани унга рақобат кўрсатишни хоҳлаб, орқага қарамасдан дарвоза томон кучли пас берди, Мерет эса бунга тайёр эмасди. Кўп ўтмай Лукакунинг ўйини чиқмаган кунлари ўз голлари билан жамоаси жонига ора кирадиган Распадори ҳисобни тенглаштирди, аммо шу куни неаполитанликлар уйга бир очко ҳам олиб кета олмади.

Қишда жамоани кучайтира олган Сеск Фабрегас «Комо»ни янги даражага олиб чиқмоқда. В сериядан чиққан дебютант ўтган турда «Фиорентина» майдонида ғалаба қозонганди, бу сафар эса скудеттога даъвогарлардан бирини мағлуб этди. Италияга осон мослашаётган «Бетис» тарбияланувчиси Ассане Диалло бу ўйинда ҳам ўз номини таблога ёздириб қўйди. Нико Паснинг узатмасидан кейин ҳимоячилардан қочиб кетган 19 ёшли форвард А сериядаги саккизинчи ўйинида бешинчи голини урди. Бу шу ёшдаги футболчилар учун топ-5 лигалардаги энг юқори сермаҳсуллик.

Ушбу ёш футболчи Кутронени захирада қолдирмоқда ва «Комо»ни хавфли зонадан олиб чиқмоқда. «Наполи» эса қаторасига тўртинчи ўйинда очко йўқотди ва уч дурангдан кейин мағлубиятга учради. Антонио Конте жамоаси пешқадамликни қайтариб олиш учун ҳафта охирида «Интер»ни мағлуб этиши керак. Бу учрашув чемпионлик ўйинига айланади.

«Эмполи» — «Аталанта» 0:5
Голлар: Гяси (27, автогол), Ретеги (33), Лукман (43, 55), Дзаппакоста (74).
«Эмполи» — Силвестри, Какаче, Де Шильо, Гогличидзе, Грасси (Журковски, 72), Мале (Коваленко, 83), Ҳендерсон, Пеццелла, Гяси (Самбия, 57), Эспозито (Кампанелло, 72), Куаме (Коломбо, 58).
«Аталанта» — Карнезекки, Колашинац, Жимсити (Толои, 63), Пош, Лукман (Куадрадо, 76), де Кетеларе (Эдерсон, 63), Дзаппакоста (Ружери, 86), Пашалич (Брешианини, 76), де Рон, Белланова, Ретеги.
Огоҳлантириш: Карнезекки (67).

ЕЧЛ умумий гуруҳида кучли ўйин кўрсатганига қарамай, якунда саккизликка кира олмаган ва ўтиш ўйинларида камтарона «Брюгге» тўсиғидан ўтолмаган «Аталанта» бор аламини «Эмполи»дан олди. Бергамоликлар «Брюгге» дарвозасига кирмаган голларини ҳам якшанба куни уриб олишди. Биринчи бўлим ўрталаридан ўтганда Дзаппакостанинг жарима майдонига узатмасидан кейин тўп Гяссининг бошига теккан ҳолда дарвоза тўрига йўл олди ва меҳмонларнинг иштаҳаси очилди. Еврокубокда муҳим пеналтини ура олмаган ва мураббийдан дакки эшитиб олган Лукман иккита гол урди. Нигериялик футболчи айни вақтда жамоасининг Италия чемпионатининг қаторасига учинчи мавсумида камида ўнта гол ураётган ягона футболчиси. Асосийси эса — Жан Пиеро Гасперини шогирдлари скудетто учун курашга қайтди. Биринчи ўрин билан атиги уч очко ажратиб турибди.

«Каляри» — «Ювентус» 0:1
Гол: Влаҳович (12).
«Каляри» — Каприле, Заппа, Мина, Луперто, Аужелло, Зортеа (Марин, 70), Адопо (Виола, 70), Макумбу (Паволетти, 86), Дейола (Коман, 58), Феличи (Лувумбу, 46), Пикколи.
«Ювентус» — Ди Грегорио, Веа, Гатти, Келли, Камбиязо (Руҳи, 73), Копмейнерс (Коло-Муани, 62), Локателли (Тюрам, 73), Консейсау (Луиз 62, Мбангула 82), Маккенни, Йилдиз, Влаҳович
Огоҳлантириш: Веа (49).

ЕЧЛнинг яна бир омадсиз иштирокчиси бор эътиборини ички чемпионатга қаратиш имкониятига эга бўлди. «Ювентус» «Лацио»нинг мағлубиятидан фойдаланди ва Сардинияда ғалаба қозониб, тўртинчи ўринга кўтарилди. Якшанба кунги ўйинларни якунлаб берган туринликлар илк дақиқалардан кучли босим уюштиришди ва Тиагу Мотта ҳужумчи танлашда тўғри танлов қилгани ойдинлашди. Охирги турларда Коло Муани билан рақобатда ютқазаётган Влаҳович майдонга катта иштиёқ билан тушиб келди. Ҳимоячининг хатосини пойлаган сербиялик ҳужумчи тўпни эгаллаб олгач, дарвозабонни ҳам алдаб ўтди ва ўткир бурчакдан бўш қолган дарвозани ишғол этди. Бу Влаҳовичнинг «Ювентус»даги (42+8) 50-голли натижаси бўлди ва у асосий таркибга қайтиш учун жиддий қадам ташлади.

“Замин” янгиликларини “Telegram”да кузатиб боринг