Каталониянинг “Барселона” клуби ва жамоа бош мураббийи Ҳанс-Дитер Флик ўртасида ҳамкорликни давом эттириш бўйича муҳим келишувга эришилди. Маълум қилинишича, янги шартнома 2028 йилгача амал қилади ва унда яна бир йилга узайтириш имконияти ҳам назарда тутилган.
Манбаларга кўра, келишув шартларига асосан, 2027/28 йилги мавсум якунида ҳар икки томон рози бўлса, шартнома автоматик тарзда яна бир йилга узайтирилиши мумкин. Бу эса клуб раҳбарияти ва мураббий ўртасида ўзаро ишонч юқори даражада эканини кўрсатади.
Қайд этилишича, расмий имзолаш жараёни “кўк-анорранглилар” Испания чемпионлигини қўлга киритгач амалга оширилади. Ҳозирда “Барселона” Ла Лигада мавсум якунига 5 тур қолган бир пайтда рақибларидан 11 очко фарқ билан пешқадамликни сақлаб турибди.
Флик раҳбарлигида жамоа барқарор ўйин намойиш қилиб, чемпионликка ишонч билан яқинлашмоқда. Унинг тактик ёндашуви, жамоавий интизом ва ёш футболчиларга берилаётган имкониятлар мухлислар ва мутахассислар томонидан юқори баҳоланмоқда.
Шу тариқа, “Барселона” ўз келажагини барқарор мураббий билан боғлашни афзал кўрмоқда. Энди асосий масала — жамоа бу ишончни чемпионлик билан мустаҳкамлай оладими? Яқин ҳафталар бу саволга жавоб беради.
“Zamin”ни Telegram'да ўқинг!
