Актриса ва блогер Феруза Норматова “ЯшинТВ” лойиҳасидаги суҳбатида турмуш ўртоғининг фарзандига бўлган муносабати ҳақида самимий фикр билдирди.
Унинг айтишича, турмуш ўртоғи фарзандини жуда яхши кўради ва у учун ҳар нарсага тайёр: “'Алимент' деган гап бизда муаммо эмас. Турмуш ўртоғим: 'Боламни кўрсам бўлди, алиментни умр бўйи тўлайман. Боламни берса, ҳамма нарсамни бераман', дейди. У боласи учун машина олиб беришни, чет элга саёҳатларга олиб боришни, уни хурсанд қилишни хоҳлайди.”
Феруза Норматова шу билан бирга, бу масалада қийинчиликлар ҳам бўлаётганини яширмади: “Афсуски, у томонда турли тўсиқлар бор. Болани отасидан узоқлаштириш, 15 суткалаб қаматиш, отасига бир йиллаб боласини кўрсатмаслик, ҳатто бошқа одамни 'дада' деб айттиришга уриниш — бу инсонийликка тўғри келмайди.”
Актриса турмуш ўртоғининг фарзандини қабул қилишга тайёр эканини ҳам таъкидлади: “Мен у болани ўз фарзандимдек қабул қилишга тайёрман. Турмуш ўртоғимнинг хотиржамлиги — менинг ҳам хотиржамлигим. Отани боласидан, болани отасидан ажратадиган инсон бўлишни истамайман.”
У, шунингдек, бу масалада кўп гап-сўзларга қарамай ўз позициясидан қайтмаслигини билдирди: “Болага бўлган меҳр билан аёлга бўлган меҳрни солиштириб бўлмайди — бу икки хил туйғу. Улар фарзанди билан бахтли бўлса, мен ҳам хурсанд бўламан”, — деди Феруза Норматова.
