Ла Лиганинг 15-турида "Атлетик Бильбао" ўз майдонида "Атлетико Мадрид"ни 1:0 ҳисобида мағлуб этди. Учрашув тақдирини Алекс Беренгернинг 84-дақиқадаги аниқ зарбаси ҳал этди.
"Сан Мамес" стадионида ўйин юқори темпда бошланди. "Атлетико" биринчи бўлиб ҳужумга ўтиб, ўнг қанотдан бурчак зарбаси ишлаб олди.
Бироқ мезбонлар тезда ўйинни ўз дарвозасидан узоқлаштириб, тўпни назорат қила бошлашди. Нико Уильямс чап қанотдан тез-тез хавфли ҳужумлар ташкил этиб, Облак дарвозасига узатмалар амалга оширди.
Битта бурчакдан сўнг Гурусета бош билан зарба йўллади, аммо аниқ нишонга ола олмади. Мадридликлар жавоб ҳужумларини Алварес орқали амалга оширишди, у жарима майдончасидан ташқарида хавфли зарба берди.
Биринчи бўлимда Эмерик Лапорт жароҳат олди ва ўйинни давом эттира олмай, ўрнига Вивиан туширилди. Танаффусгача ҳар икки жамоа имкониятлар яратди, аммо дарвозабонлар ўз ишини мукаммал бажарди.
Симон Алмаданинг бир зарбасини қайтариб, "Атлетик"ни халос этди, Облак эса мезбонларнинг узатмаларига ва узоқ масофадан берган зарбаларига ишончли жавоб берди. Биринчи бўлимга икки дақиқа қўшилган бўлишига қарамай, ҳисоб очилмади.
Иккинчи бўлимда Диего Симеоне Галлагернинг ўрнига Кокени тушириб, ўйинни тезлаштиришга ҳаракат қилди. Мадридликлар қанотларни фаоллаштиришга интилишди, лекин мезбонлар тартибли ҳимояланишда давом этишди.
"Атлетик" тезкор қарши ҳужумларда Сансет ва Нико Уильямс орқали омад излашда эди. Паредес бурчакдан келган узатмадан бош билан зарба берди, лекин тўп дарвоза устидан ўтиб кетди.
Симеоне ҳужумни кучайтириш мақсадида Гризман ва кейинчалик Распадорини майдонга туширди. Шунга қарамай, "Атлетико" аниқ вазият яратишда қийналди.
Ўйиннинг сўнгги дақиқаларида "Атлетик" босими янада ошди. Стадиондаги мухлислар жамоани олға чорлар, дуранг натижани қабул қилмас эди.
85-дақиқада мезбонлар сафарбарликда муваффақиятга эришди. Симон тўпни тезда ўйинга киритиб, мезбонларнинг тезкор ҳужумини бошлади.
Нико Уильямс чап қанотдан ўнгга силжиб, Беренгерга аниқ пас берди. Беренжер жарима майдончаси чизиғида тўпни қабул қилиб, рақибни алдади ва дарвозанинг ўнг юқори бурчагига аниқ зарба йўллади.
Облак бундай зарбани қайтара олмади ва "Сан Мамес" стадионида мухлисларнинг қувончли нидоси янгради. Қолган вақтда "Атлетико" гол уришга уриниб, босимни оширди, аммо "Атлетик" ҳимояси ишончли ўйнаб, хатоларга йўл қўймади.
Шундай қилиб, "Атлетик Бильбао" муҳим ва минимал ҳисобдаги ғалабани қўлга киритди. Беллашув 1:0 ҳисобида баскларнинг ғалабаси билан якунига етди.
Натижада «Атлетик» очколари сонини 23 тага етказиб, 7-ўринда. «Атлетико» 31 очко билан 4-поғонада жойлашган.
Ла Лига. 15-тур
Атлетик – Атлетико 1:0
Гол: Беренгер 85
Атлетик – Симон, Аресо (Горосабел, 82), Паредес, Лапорт (Вивиан, 33), Берчиче, Галаррета (Рего, 66), Хаурегисар, Беренгер, Сансет (Изета, 82), Уилямс, Гурусета (Гомес, 66).
Атлетико – Облак, Молина, Пубил, Ленгле (Ружжери, 62), Ҳанско, Симеоне, Галлаҳер (Коке, 46), Барриос, Гонсалес (Распадори, 72), Алмада (Сёрлот, 62), Алварес (Гризманн, 66)
Огоҳлантиришлар: Ҳаурегисар 14, Галаррета 20, Лапорт 28 – Галлаҳер 12, Коке 90+4.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
