2026 йил 5 январ куни соат 05:03 да Тошкент вақти билан А Сериянинг 18-турида «Интер» ўз майдонида «Болонья»ни 3:1 ҳисобида мағлуб этиб, 39 очко билан яна турнир жадвалининг энг юқори поғонасига кўтарилди. Бу ҳақда kursiv.uz хабар беради.
Учрашув бошидан миланликлар тўп назоратини қўлга олди ва рақибни ўз жарима майдони атрофида ушлаб турди. «Болонья» эса асосан кам сонли қарши ҳужумлар билан жавоб қайтариб, дарвозабон Равальянинг ишончли ўйини эвазига узоқ вақт ҳисобни сақлаб турди. Бироқ 39-дақиқада меҳмонлар тезкор ўтиш пайтида ҳимояда хатога йўл қўйди: Лаутаро Мартинес йиқилаётган ҳолатда жарима майдони ёйига пас узатди, Петр Зелински чап бурчакка аниқ зарба бериб, ҳисобни очди.
Иккинчи бўлимда «Интер» суръатни янада ошириб, қанотлар орқали босимни кучайтирди. 51-дақиқада Чалҳоноғлу бурчак тўпини узатди, Мартинес эса позицияни ютиб, боши билан 2:0 ни расмийлаштирди.
Кейинги дақиқаларда мезбонлар стандарт вазиятлар ҳисобига жарима майдонини мунтазам «юклаб» борди. 74-дақиқада Димарко тўпни жаримага оширди, Тюрам эса ҳимоячилар қаршилигини енгиб, учинчи голни урди.
«Болонья» 85-дақиқада фарқни қисқартирди: Кастро Ликойаннис узатмасини якунлаб, ҳисобни 3:1 кўринишига келтирди. Шундан сўнг «Интер» ўйин якунини хотиржам назорат қилиб, ғалабани сақлаб қолди.
Бу натижа «Интер» учун Суперкубокдаги яқиндаги омадсизликдан кейинги реванш бўлди. Милан клуби 39 очко билан яна етакчига айланди, «Болонья» эса 26 очко билан 7-ўринда қолди.
“Zamin”ни Telegram'да ўқинг!
