Оила билан боғлиқ сабабларга кўра яқинда футболчилик фаолиятини якунлаган словениялик ярим ҳимоячи Кевин Кампл «РБ Лейпсиг»даги даврларини эслаб, ўша пайтдаги мураббийи Ралф Рангник билан боғлиқ воқеани сўзлаб берди. Бу ҳақда euro-football.ru хабар беради.
Камплнинг айтишича, рафиқаси туғруқ арафасида бўлганига қарамай, Рангник уни барибир учрашувга етиб келишга мажбур қилган. «Ортиндан самолёт юбораман, сен бу ўйинда майдонга тушишинг шарт», деган экан мураббий.
Гап «Волфсбург»га қарши баҳс ҳақида кетмоқда: ўша учрашувда Рангник жамоаси 4:0 ҳисобида ғалаба қозонган. Ўйиндан сўнг эса Кампл яна ҳам кўпроқ ҳайрон қолган: Рангник журналистлар билан суҳбатда гўё футболчи ўзи жон-жаҳди билан ўйнашга интилгандек гапирган, аслида эса вазият бунинг мутлақо тескариси бўлган.
“Zamin”ни Telegram'да ўқинг!
