Yoqilgʻi narxi oshib borayotgan bir paytda, ayniqsa uzoq masofalarga qatnaydigan haydovchilar uchun har bir litr benzinning qadri ortib bormoqda. Bozordagi eng tejamkor avtomobillardan biri boʻlgan Toyota Prius kundalik foydalanishda qanchalik samarali ekanini aniqlash maqsadida maxsus sinov oʻtkazildi. Avtomobilning 40 litrli bakini toʻldirish oʻtgan oyga nisbatan sezilarli darajada qimmatlashgan boʻlsa-da, bort kompyuteri 467 mil (taxminan 750 km) masofa bosib oʻtishni vaʼda qildi. Bu haqda Autocar.co.uk xabar beradi.
Ushbu plug-in gidrid modelning 13,6 kW/soat quvvatga ega batareyasi jamoat quvvatlash stansiyasida toʻldirildi, bu esa real sharoitda qoʻshimcha 35-40 mil masofani taʼminlaydi. Sinov rejasi oddiy: avtomobilning ikkala energiya manbai tugaguncha haydash. Bunda hech qanday sunʼiy tejamkorlik usullaridan foydalanilmadi, haydash uslubi oʻzgartirilmadi, faqat shinalar bosimi meʼyoriga keltirildi. Sinov marshruti ishga qatnash, aeroportga borish va shaharlararo uzoq safarlarni oʻz ichiga oldi.
Toyota Prius nafaqat tejamkorligi, balki dinamikasi bilan ham hayratda qoldirdi. Yangi modelda Toyota muhandislari avtomobilni oddiy taksi xizmati vositasidan koʻra jozibadorroq qilishga intilishgan. 2,0 litrli benzinli dvigatel va elektr motorining birgalikdagi 223 ot kuchi quvvati avtomobilga 0 dan 100 km/soat tezlikka 6,8 soniyada erishish imkonini beradi. Bu krossover va sedanlar orasida ancha chaqqon koʻrsatkichdir.
Past oʻrindiq va kichik rul boshqaruvi bilan birgalikda Prius kutilmagan haydash zavqini taqdim etadi. Avtomobil magistral yoʻllarda oʻzini juda xotirjam tutadi, burilishlarda esa kutilganidan koʻra barqarorroq. Sinov yakunida maʼlum boʻldiki, zamonaviy Prius nafaqat hamyonni tejaydi, balki haydovchiga dinamik harakatlanish imkoniyatini ham qoldiradi.
“Zamin”ni Telegramʻda oʻqing!
