Yangi yil O‘zbekistonda eng intiqlik bilan kutiladigan bayramlardan biri hisoblanadi. Bu kunda oila a’zolari, yaqinlar va mehmonlar uchun dasturxon to‘kin-sochin qilib bezatish an’anaga aylangan. 2025 yilgi Yangi yil arafasida 4 kishilik oila va mehmonlar bilan birga 6–8 nafar inson uchun mo‘ljallangan bayram dasturxoni qancha mablag‘ talab qilishini tahlil qilib chiqdik.
Yangi yil dasturxonini salatlarsiz tasavvur qilib bo‘lmaydi. Eng mashhur salatlardan biri — olive. Taxminan 3–3,5 kg hajmda tayyorlanadigan olive uchun kartoshka, sabzi, 10–12 dona tuxum, qaynatilgan kolbasa yoki tovuq filesi, tuzlangan bodring, yashil no‘xot va mayonez kerak bo‘ladi. Bozor va supermarketlardagi joriy narxlarga ko‘ra, bu salatni tayyorlash 135–150 ming so‘mga tushadi.
Yana bir an’anaviy salat — seld balig‘i ostidagi salat. Uni tayyorlash uchun 2–2,5 kg hajmda seld balig‘i, lavlagi, kartoshka, sabzi, piyoz va mayonez zarur. Asosiy xarajat baliq hissasiga to‘g‘ri kelib, umumiy summa 140–160 ming so‘m atrofida bo‘ladi.
Qish fasliga qaramasdan, yangi yil dasturxonida yangi sabzavotlardan tayyorlangan salat ham bo‘ladi. Pomidor va bodring, bir dasta ko‘kat va o‘simlik yog‘i bilan tayyorlanadigan ushbu salat uchun 90–110 ming so‘m sarflanadi. Natijada salatlar uchun umumiy xarajat 365–420 ming so‘mni tashkil qiladi.
Asosiy taom sifatida ko‘pchilik pechda pishirilgan tovuqni tanlaydi. Limon, ziravorlar va sabzavotlar bilan tayyorlanadigan 2 kg tovuq uchun 180–200 ming so‘m atrofida mablag‘ ketadi. Bayram dasturxonining yana bir muhim taomi — palov. 1,5 kg guruch, 700–800 gram go‘sht, sabzi, piyoz, yog‘ va ziravorlar bilan tayyorlanadigan palov uchun 240–250 ming so‘m talab etiladi.
Baliqli taomlar ham bayramga o‘ziga xos mazza qo‘shadi. Sazan yoki sudak balig‘i limon va sabzavotlar bilan pechda pishiriladi. 2–2,5 kg baliq uchun sarflanadigan mablag‘ 290–320 ming so‘mni tashkil etadi.
Mevalar yangi yil dasturxonining ajralmas qismi hisoblanadi. Mandarin, olma, banan, kivi va ananas xaridi uchun o‘rtacha 265 ming so‘m ketadi. Gazak sifatida pishloq, yong‘oq va pista tanlanadi: 0,5 kg pishloq uchun 50 ming so‘m, yong‘oq uchun 60 ming so‘m, pista uchun esa 100 ming so‘m talab qilinadi. Non va lavash esa 15–20 ming so‘m atrofida turadi. Shu tariqa, meva va gazaklar uchun umumiy xarajat 625 ming so‘mga yetadi.
Ichimliklar — soklar, gazlangan ichimliklar va mineral suv uchun taxminan 100 ming so‘m ajratiladi. Shirinliklar ham bayram kayfiyatini to‘ldiradi: 3 kg konfet 150 ming so‘m, 1,5 kg pirojniy 120 ming so‘m, vafli 30 ming so‘mga tushadi. Tort esa 220–280 ming so‘m oralig‘ida bo‘ladi. Umumiy hisobda shirinliklar uchun taxminan 300 ming so‘m ketadi.
Shu tariqa, Yangi 2025 yil dasturxonini to‘kin va mazmunli qilish uchun umumiy xarajatlar 2,5–3 million so‘m atrofida bo‘lishi mumkin. Bayram yaqin, hisob-kitob esa oldindan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
