Xonanda Sevinch Mo‘minova Mirsadikova bilan bo‘lgan intervyusida shaxsiy hayoti va turmush haqidagi qarashlarini ochiq bayon qildi.
Boshlovchi xonandadan:
— “Uylanmagan, o‘zingizdan kichik yigitlardan ham turmush qurish takliflari bo‘lganmi?” — deb so‘radi.
Sevinch bu savolga quyidagicha javob berdi:
— “Ha, bunday takliflar ko‘p bo‘lgan. Lekin men avvalo insonning dunyoqarashiga qarayman. Yoshi men uchun unchalik muhim emas. Agar yosh bo‘lsa ham, dunyoqarashi keng, fikrlashi kattalarnikidek bo‘lsa, rozi bo‘laman. Harakterimiz va dunyoqarashimiz mos kelsa, albatta xo‘p deyman.”
Shundan so‘ng jurnalist:
— “Xotini vafot etgan yoki ajrashgan erkaklardan ham taklif bo‘lganmi? Bo‘lsa, qanday qaraysiz?” — deya qiziqdi.
Xonanda bu savolga ham ochiq javob berdi:
— “Ha, bunday takliflar ham bo‘lgan. Lekin men avvalo nega ajrashganini bilaman. Agar kechirilmaydigan jiddiy sabablar tufayli ajrashgan bo‘lsa, dunyoqarashi keng va harakterimiz to‘g‘ri kelsa, rozi bo‘lishim mumkin. Ammo oddiy narsalar tufayli, xato erkak tomonidan bo‘lib ajrashilgan bo‘lsa — yo‘q. Chunki yaxshi erni hech qaysi ayol osonlikcha qo‘yib yubormaydi.”
Sevinch o‘z qarashlarini davom ettirib shunday dedi:
— “Dunyoqarashi bolalarnikidek, menikidan past bo‘lgan inson bilan yashaganimdan ko‘ra hozirgi hayotim ming marta yaxshi. Men hozir juda baxtliman. Past harakterli, tor fikrli inson bilan umr o‘tkazib, uni tarbiyalayman deb asablarimni yemayman. Erkak erkak bo‘lishi kerak. Men uning yonida erkatoy bo‘lib, unga suyanib yashashim, ishonishim kerak.”
Suhbat davomida Sevinchdan:
— “Ikkinchi ayollikka takliflar ham ko‘p bo‘lsa kerak?” — deb so‘radi.
Xonanda bunga qat’iy javob berdi:
— “Ha, bunday takliflar ham bo‘lgan. Lekin men ikkinchi ayol bo‘lib yashash juda qiyin, deb o‘ylayman. Men bo‘lisha olmayman, bo‘lishgim ham kelmaydi. Ich ichimni yeyman. Agar adolat bo‘lmasa, bunday turmushni qabul qila olmayman. Axir aytilgan: agar adolat qila olsanggina uylan, bo‘lmasa bitta bilan shukr qilib yashayver. Adolat bo‘lmasa, bunday nikoh uzoqqa bormaydi va albatta kimnidir baxtsiz qiladi.”
Mehmon guruhidagi foydalanuvchilar ushbu nashrga izoh qoldira olmaydi.
