«Barselona» bosh murabbiyi Hans-Diter Flik klub bilan shartnomani uzaytirish ehtimoli haqidagi gap-so‘zlarga munosabat bildirdi. So‘nggi kunlarda kataloniyaliklar nemis mutaxassisi bilan yangi kelishuv ustida ish boshlagani haqida xabarlar paydo bo‘lgan edi. Ayni paytda Flikning amaldagi shartnomasi 2026/27 yilgi mavsum yakuniga qadar amal qiladi.
Mutaxassisning ta’kidlashicha, murabbiylik faoliyatida hatto bir yarim yil ham katta muddat hisoblanadi. Shu sabab u bu masalaga shoshilmasdan, vaziyatga xotirjam qaramoqda. Flik o‘z so‘zlarida «Barselona»da ishlayotganidan chin dildan mamnun ekanini alohida ta’kidladi.
Uning aytishicha, jamoada shakllangan muhit, murabbiylar shtabi bilan o‘zaro ishonch va hamjihatlik uning ishini ancha yengillashtirmoqda. Ayniqsa, sport direktori Deku bilan o‘zaro munosabatlar yuqori darajada ekani qayd etildi. Flik bu hamkorlikni juda samarali, deb baholadi.
Shuningdek, nemis mutaxassisi klub prezidentining ishonchi u uchun katta ahamiyat kasb etishini yashirmadi. Aynan rahbariyat tomonidan bildirilgan ishonch uning «Barselona»ga kelishida hal qiluvchi omil bo‘lgan. Flikning fikricha, yana bir yarim yil davomida jamoa bilan ishlash mutlaqo tabiiy holat, biroq keyingi qarorlar prezident pozitsiyasiga ham bog‘liq bo‘ladi.
«Biz uchun eng muhimi — sifatli futbol namoyish etish va natijalarga erishish. Qolgan masalalar keyin muhokama qilinadi», — deya ta’kidladi murabbiy.
Qayd etish joiz, Hans-Diter Flik qisqa vaqt ichida jamoada ijobiy psixologik muhit yaratishga erishdi. «Barselona» uning qo‘l ostida barqaror o‘yin ko‘rsatib, muxlislarda kelajakka nisbatan ishonch uyg‘otmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
