Krishtianu Ronaldu kelajagini bo'laklab sotayotgandek: har mavsum yangi savollar, har hafta esa yangi sarlavha. Jurnalist Ben Jeykobs bergan ma'lumotlarga ko'ra, afsonaviy portugaliyalik 2027 yilda «Al-Nasr»dagi faoliyatini yakunlashi ehtimoli bor. Bu haqda euro-football.ru xabar beradi.
Quruq raqamlar hammasini aytib turibdi: Ronaldu hozir 40 yoshda.
U faoliyati davomida 960 ta gol urdi va minglik marraga yetish istagi hanuz o'zgargani yo'q. Saudiyadagi shartnomasi 2027 yilgacha, «Al-Nasr» safida esa 125 o'yinda 110 gol qayd etgan.
Bu ko'rsatkichlar nafaqat statistika, balki uning maydonni tark etishga shoshilmayotganini ham anglatadi. Ronaldu ochiq aytadi: oilasi to'xtashni maslahat beradi, u esa o'zini hamon klub va terma jamoaga foydali deb biladi. Uning jismoniy tayyorgarligi alohida tizimga aylangan: mushaklar aktiv, rekordlar esa valuta.
Portugaliyalik A Bola nashriga bergan fikrida ham shu kayfiyatni yashirmadi:
«O'ylashimcha, men hali ham yaxshiman, klubim va terma jamoamga yordam beryapman, unda nega davom etmasligim kerak».
Shu bilan birga, futbol tashqarisidagi dunyo unga boshqa yo'lni ham ko'rsatmoqda. «Manchester Yunayted», «Nyukasl», «Vilyarreal» va «Fiorentina»da o'ynagan Juzeppe Rossi Goal.com'ga bergan intervyusida Ronalduni Gollivudga chorlab, hatto Joker kabi salbiy qahramon rolini ham tilga oldi. Fransiya terma jamoasi, «Arsenal» va «Barselona» sobiq yarim himoyachisi Emmanuel Peti esa Hochgepokert'da bu mavzuni yanada oshirib, «Oskar» darajasigacha olib chiqdi.
Bu gaplar tasodifiy emas: Ronaldu allaqachon oddiy futbolchi emas, u katta brendga aylangan. Uning uchun jarima maydonidan kinostudiyaga o'tish, «Al-Nasr»dan yana bir klubga qaytishdan ham mantiqliroq ko'rinishi mumkin. Kamera uni o'ng oyog'idagi zarbadek yaxshi ko'radi, shu sabab «yangi Joker» g'oyasi ham casting qaroriga o'xshaydi. Axir tomoshabin bilan pauza va hissiyot orqali o'ynashni, so'ng «Siu» bilan portlatishni undan yaxshi kim biladi?
Biroq asosiy masala kino emas, «Al-Nasr» uni ushlab qolish uchun klubdagi ulushini 15 foizgacha oshirishga tayyor ekani haqidagi mish-mishlar ham emas. Eng katta sinov — futboldan keyin ham o'ziga bo'lgan qiziqishni ushlab qolish. Uning atrofidagilar e'tibor pasayib ketmasligi uchun reja ustida bosh qotirayotgani aniq.
Yana bir detal ham bor: ayni paytda Madeyrada Ronalduning haykali yoqib yuborilgani haqida xabarlar tarqaldi, politsiya vandallarni ushladi. Ronaldu esa navbatdagi golidan keyin «Ishonishda davom etamiz, kurashishda davom etamiz» degan mazmunda yozuv qoldirdi. Go'yo ikki film parallel ketayotgandek: birida u 960-golini uradi, boshqasida esa bronza qiyofasi kulga aylantirilmoqchi. Ikkala syujet ham bir narsani eslatadi: ulkanlikka nisbatan nafrat va abadiylik oldidagi qo'rquv.
Ronaldu maydonni tark etsa, bu qanday bo'ladi? Sokkin «rahmat» varianti portugaliyalikka mos emas. Stadionlar bo'ylab olqishli turne, hujjatli film, reklama kampaniyalari va minginchi gol uchun yana bir katta hisob-kitob — bular ancha mantiqli, hatto odilona ko'rinadi. Chunki u har doim tribunada oddiy muxlislar emas, hakamlar hay'ati o'tirgandek o'ynagan.
Ehtimol, eng keskin xulosa shuki: Ronaldu faoliyatini tugatishdan qo'rqmaydi, u yangilik yaratuvchi bo'lishdan to'xtab qolishdan cho'chiydi. U axborot sababini hamma narsadan topadi — Pirs Morgan bilan intervyudan tortib «Betmen»dagi ehtimoliy Joker roliga qadar.
Ronaldu qolgan bir necha yilidan rohatlanmoqchi ekanini aytar ekan, dunyo esa o'sha «bir necha yil» aslida qancha ekanini muhokama qilishda davom etadi. Portugaliyalik esa o'zi eng yaxshi biladigan ishni qiladi: har bir qadamini voqeaga, har bir golini dalilga, har bir «tez orada»sini esa cheksizlikka aylantiradi. Uning olamida hatto xayrlashuv ham rekord bo'lishi kerak.
Arman Tigranyants
“Zamin”ni Telegramʻda oʻqing!
