Zap Energy termoyadroviy startapi o'zining asosiy qurilmalari bilan bir qatorda yadroviy bo'linish reaktorlarini ham ishlab chiqishini ma'lum qildi. Kompaniya ishlaydigan elektr stansiyasini qurish yo'lini o'rganib chiqib, birinchi navbatda bo'linish stansiyasini yaratish tezroq bo'ladi degan qarorga keldi. Bu haqda Techcrunch.com xabar beradi.
Kompaniyaning yangi bosh direktori Zabrina Johal bo'linish va sintez bitta tanganing ikki tomoni ekanligini ta'kidladi. Zap Energy 300 million dollardan ortiq sarmoya jalb qilgan eng yaxshi moliyalashtirilgan startaplardan biri hisoblanadi.
Bu qaror sun'iy intellekt ma'lumotlar markazlari tomonidan o'sib borayotgan energiya talabi fonida qabul qilindi. 2030 yilga borib bu talab qariyb uch barobar oshishi kutilmoqda.
Texnologiya kompaniyalari elektr energiyasiga hozirdanoq muhtoj, biroq termoyadroviy stansiyalar kamida o'n yildan so'ng tayyor bo'ladi.
Bo'linish reaktorlari tijorat jihatdan ancha foydali hisoblanadi. Zap Energy o'zining yangi biznesidan bir yil ichida daromad olishni boshlashni rejalashtirmoqda.
Daromad mudofaa va energetika vazirliklarining federal dasturlaridan, shuningdek, katta miqdorda elektr energiyasiga muhtoj kompaniyalardan kelishi mumkin.
Startapning bo'linish reaktori Toshiba va Yaponiyaning energetika sanoati tadqiqot instituti tomonidan birgalikda ishlab chiqilgan 4S dizayniga asoslanadi. Johalning so'zlariga ko'ra, 2030 yillarda talab shu qadar yuqori bo'ladiki, kompaniya o'z mijozlarini osongina topadi.
“Zamin”ni Telegramʻda oʻqing!
