Krishtianu Ronaldu kelajagini goyo bo'laklab sotayotgandek: har mavsum uning atrofida yangi taxminlar, yangi sarlavhalar. Jurnalist Ben Jeykobs ma'lumotiga ko'ra, 2027 yilda afsonaviy portugaliyalik «An-Nasr»ni tark etishi ehtimoli bor. Bu haqda euro-football.ru xabar beradi.
Quruq raqamlar hammasini aytib turibdi: Ronaldu hozir 40 yoshda.
U faoliyati davomida 960 ta gol urdi va minglik marrani ko'zlaganini yashirmaydi. Saudiya Arabistonidagi shartnomasi 2027 yilgacha amal qiladi. «An-Nasr» safida esa 125 o'yinda 110 bor raqib darvozasini ishg'ol qilgan.
Bu ko'rsatkichlar nafaqaga chiqishni emas, aksincha, davom etish kayfiyatini eslatadi. Ronaldu oilasi to'xtashni maslahat berishini aytadi, biroq u hanuz klubiga ham, terma jamoasiga ham foydasi tegayotganini ta'kidlaydi. Uning intizomi va jismoniy tayyorgarligi alohida bir standartga aylangan: mushaklar — kapital, rekordlar — valuta.
Ronaldu A Bola nashriga bergan fikrida buni ochiq bildirib o'tgan:
«Men hali ham yaxshi holatdaman, klubim va terma jamoamga yordam beryapman, unda nega davom etmasligim kerak?»
Shu bilan birga, futbol ortidan boshqa sahnalar ham unga “eslatma” berayotgandek. «Manchester Yunayted», «Nyukasl», «Vilyarreal» va «Fiorentina»da o'ynagan Juzeppe Rossi Goal.com'ga intervyusida Ronalduni Gollivudga chorlab, hatto Joker obrazini taklif qilgan. Fransiya terma jamoasi, «Arsenal» va «Barselona» sobiq yarim himoyachisi Emmanuel Peti esa Hochgepokert'da bu g'oyani yanada “katta” qilib, hatto «Oskar» haqida ham gapirgan.
Bu gaplar tasodifiy eshitilmaydi: Ronaldu allaqachon oddiy futbolchi emas, butun bir brend. Uning uchun jarima maydonidan kino pavilyoniga o'tish «An-Nasr»dan yana bir klubga o'tishdan ham mantiqiyroq ko'rinishi mumkin. Kamera uni zarba singari yaxshi “ko'radi”, shu bois yangi Joker haqidagi fikr ham kastingdagi tabiiy variantdek jaranglaydi. Axir u muxlis bilan pauza va portlovchi emotsiya orasidagi o'yinni «Siu»gacha olib chiqa oladigan futbolchi.
Biroq asosiy masala kino emas. Gap shundaki, Ronaldu ilk bor futbol tugagach ham o'ziga bo'lgan qiziqishni qanday saqlab qolish savoliga yaqin kelmoqda. OAVda «An-Nasr» uni ushlab qolish uchun klubdagi ulushini 15 foizgacha oshirishga ham tayyorligi haqida mish-mishlar yuradi, lekin baribir diqqati markazida — Ronaldudan keyingi Ronaldu davri.
Yana bir detal ham bor: shu kunlarda Madeyrada uning haykaliga o't qo'yishga urinish bo'lgani, politsiya vandalni qo'lga olgani aytiladi. Ronaldu esa navbatdagi golidan keyin “Ishonishda davom etamiz, kurashishda davom etamiz”, degan mazmunda yozib qoldirgan. Manzara ikki syujetli filmga o'xshaydi: birida u 960-golini uradi, boshqasida esa bronza timsolini kulga aylantirishga urinadilar. Ikkalasi ham bitta mavzu atrofida: ulug'likka nisbatan nafrat va abadiylikdan cho'chish.
Ronaldu ketsa, bu qanday xayrlashuv bo'ladi? «Rahmat» deb jim ketish — portugaliyalikning uslubi emas. Aksincha, stadionlar bo'ylab katta tur, film, reklama, va minginchi gol uchun alohida hisob-kitobli shou mantiqiyroq ko'rinadi. Chunki u doim maydonga chiqqanda, tribuna oddiy muxlislar emas, hakamlar hay'ati o'tirgandek o'ynagan.
Eng bahsli xulosa ham shu bo'lsa kerak: Ronaldu futbolni yakunlashdan uncha qo'rqmaydi, u yangiliklar markazidan chiqib qolishdan cho'chiydi. Axir u infopovodni hamma narsadan yasaydi: Pirs Morgan bilan intervyudan tortib, «Betmen»dagi gipotetik Joker roliga qadar.
Ronaldu “qolgan yillarimdan zavq olmoqchiman”, deb aytayotgan bir paytda, dunyo o'sha yillar aslida nechta ekanini muhokama qilishda davom etadi. Portugaliyalik esa u uddalay oladigan ishni davom ettiradi: har qadamni voqea, har golni dalil, har bir “tez orada”ni esa cheksizlikka aylantirish. Chunki uning olamida hatto xayrlashuv ham rekord darajasida bo'lishi kerak.
Arman Tigranyants
“Zamin”ni Telegramʻda oʻqing!
