"Kayserispor" safini endigina to‘ldirgan rossiyalik hujumkor yarim himoyachi Denis Makarov Turkiya futbolining o‘ziga xos tomonlari haqida fikr bildirdi. Bu haqda euro-football.ru xabar beradi.
Uning ta’kidlashicha, bu yerda o‘yin juda dinamik: jamoalar tez-tez hujumdan himoyaga, himoyadan hujumga o‘tadi. Makarovga ko‘ra, Turkiyada markaz orqali kombinatsion o‘yin kam, futbol esa ochiq va tezkor kechadi. "Bu yerda har bir o‘yinda imkoniyatlar deyarli 50 ga 50: bir jamoada besh-olti vaziyat bo‘lsa, keyingi payt raqibda shuncha imkoniyat paydo bo‘ladi. Kim tezroq gol ursa, o‘shanga yutish osonroq", — deya uning so‘zlarini "Chempionat" keltiradi.
Makarov, shuningdek, yangi jamoasini yaxshiroq tushunish uchun ko‘plab sharh va tahlillarni ko‘rib chiqqanini aytdi. Futbolchining fikricha, Turkiyada jamoalar darvoza oldida "avtobus" qo‘yib, faqat mudofaaga yopishib olish uslubini deyarli tanlamaydi.
Hozirda "Kayserispor" Turkiya Superligasi turnir jadvalida 17-o‘rinda bormoqda. Jamoa navbatdagi uchrashuvini 1 fevral kuni safarda "Galatasaray"ga qarshi o‘tkazadi.
“Zamin”ni Telegramʻda oʻqing!
