Toshkent viloyatining Ohangaron tumanida voyaga yetmagan qiz bilan bogʻliq holat keng jamoatchilik eʼtiboriga tushdi. Ushbu voqea Surayyo Rahmonova — Bolalar ombudsmani nazoratiga olingani rasman maʼlum qilindi.
Avval ijtimoiy tarmoqlarda 14 yoshli qizga nisbatan PPX xodimi tomonidan noqonuniy harakatlar sodir etilgani haqida xabarlar tarqalgan edi. Unda aytilishicha, xodim qiz va uning dugonasini avtomobilga oʻtqazib, chekka hududga olib borgan va ularga nisbatan nomaqbul xatti-harakatlar sodir etgan.
Mazkur maʼlumotlar ortidan ichki ishlar organlari tomonidan xizmat tekshiruvi tayinlandi. Shu bilan birga, Ohangaron shahri prokuraturasi tomonidan holat yuzasidan tergovga qadar tekshiruv ishlari olib borilmoqda. Bolalar ombudsmani esa voyaga yetmagan shaxs manfaatlarini taʼminlash maqsadida ishni shaxsiy nazoratga olganini bildirib, qoʻshimcha maʼlumotlar keyinchalik taqdim etilishini maʼlum qildi.
Oradan koʻp oʻtmay, Ichki ishlar vazirligi mazkur holat boʻyicha rasmiy munosabat bildirdi. Unda PPX xodimi xizmat vazifasidan chetlatilgani, holat tasdiqlansa, unga nisbatan qatʼiy huquqiy choralar koʻrilishi qayd etildi.
Biroq keyinchalik Toshkent viloyati IIBB boshqa bayonot bilan chiqib, ijtimoiy tarmoqlarda tarqalgan maʼlumotlar haqiqatga toʻliq mos kelmasligini taʼkidladi. Rasmiy maʼlumotlarga koʻra, voqea 27 aprel kuni tungi vaqtda sodir boʻlgan. PPX xodimiga tanishi boʻlgan 22 yoshli ayol qoʻngʻiroq qilib, maslahat soʻragan. Xodim yetib kelganida ayol va uning 14 yoshli tanishi avtomobilga oʻtirgan.
Shu vaqtda 18 yoshli yigit bir nechta tanishlari bilan kelib, xodimga nisbatan haqoratli gaplar aytgan va janjal kelib chiqqan. IIBBning taʼkidlashicha, ishda voyaga yetmagan shaxs ishtirok etgani sababli barcha tafsilotlar hozircha ochiqlanmaydi.
Shuningdek, idora tekshiruv yakuniga koʻra, agar ijtimoiy tarmoqlarda tarqalgan maʼlumotlar yolgʻon ekani aniqlansa, ularni tarqatgan shaxslarga nisbatan ham huquqiy choralar koʻrilishini maʼlum qildi.
Qisqacha aytganda, holat atrofida turli qarashlar va ziddiyatli maʼlumotlar mavjud. Tergov yakunlari esa voqeaning haqiqiy mohiyatiga aniqlik kiritishi kutilmoqda.
“Zamin”ni Telegramʻda oʻqing!
