La Liganing 23-turi doirasida "Villarreal" o'z maydonida "Espanol"ni 4:1 hisobida taslim etdi. Uchrashuv g'alati statistika bilan yodda qoldi: 87-daqiqagacha ikki jamoa jami atigi uchta aniq zarba yo'llagan bo'lsa-da, tablodagi hisob 4:0 edi. Bu haqda euro-football.ru xabar beradi.
Bahs boshida mehmonlar xavfli hujum uyushtirdi: chap qanotdan uzatilgan to'pni Omar el-Hilali 8 metr masofadan darvozaga joyladi, biroq hujumda qoida buzilishi qayd etilib, gol bekor qilindi. 35-daqiqada "Villarreal" hisobni ochdi: chapdan jarima maydoniga oshirilgan to'pni Teyjon Byukenen pasga tushirdi, Jorj Mikautadze esa burilib turib zarbani aniq ijro etib, to'pni o'ng yuqori burchakka yo'lladi — 1:0. Oradan ko'p o'tmay Alberto Moleyro o'ng qanotdan uzatma berdi, Xose Salinas to'pni qaytarishga urinib, uni o'z darvozasiga kiritib qo'ydi — 2:0.
Ikkinchi bo'lim boshida Moleyro markazdan Nikolas Pepeni oldinga chiqarib yubordi, hujumchi jarima maydoniga kirib, 15 metrdan past zarba bilan o'ng burchakni topdi — 3:0. 55-daqiqada esa Moleyro Mikautadzeden uzatmani qabul qilib, 12 metrdan uzoq burchakka aniq tepdi — 4:0. Yakunda "Espanol" 88-daqiqada burchak zarbasidan so'ng javob qaytardi: Sharl Pikelning uzatmasini Leandro Kabrera bosh bilan yakunladi — 4:1.
Ushbu g'alaba "Villarreal"ga turnir jadvalida uchinchi o'rindagi "Atletiko"ga yetib olish imkonini berdi. "Espanol" esa ketma-ket to'rtinchi mag'lubiyatini qabul qilib, oltinchi pog'onada qoldi.
“Zamin”ni Telegramʻda oʻqing!
