Shimoliy Amerika yashil maydonlarida (AQSH, Meksika va Kanada) bo‘lib o‘tadigan navbatdagi futbol bayrami — Jahon chempionati boshlanishiga sanoqli kunlar qoldi. Bu galgi mundial biz, o‘zbekistonlik muxlislar uchun tarixiy ahamiyatga ega, boisi milliy terma jamoamiz ilk bor dunyo birinchiligida ishtirok etadi. "Oq bo‘rilar" "K" guruhida Kolumbiya, Portugaliya va Kongo DR termalari bilan kuch sinashadilar.
Ronalduning holati qanday?
Guruhimiz favoriti bo‘lgan Portugaliya terma jamoasi ustozi Roberto Martines ayni damda yakuniy tarkib borasida bosh qotirmoqda. U yaqinda Saudiya Arabistoniga tashrif buyurib, "Al-Nasr" va "Al-Hilol" o‘rtasidagi markaziy bahsni bevosita kuzatdi. Murabbiy e’tibor markazida esa, albatta, jamoa sardori Krishtianu Ronaldu bo‘ldi.
Roberto Martines afsonaviy hujumchining sport formasi haqida shunday dedi:
"Krishtianuning g‘alabalarga bo‘lgan ishtiyoqi hamon so‘nmagan. Saudiyaga ko‘chib o‘tish uning darajasiga salbiy ta’sir qilganini ko‘rmayapman. U maydonda juda faol va terma jamoamiz uchun naqadar muhim ekanini qayta-qayta isbotlamoqda."
Hamma uchun talab bir xil
Shu bilan birga, murabbiy jamoada "imtiyozli" futbolchilar yo‘qligiga sha’ma qildi. Uning so‘zlariga ko‘ra, o‘tmishdagi yutuqlar tarkibdan joy olishni kafolatlamaydi. Hatto 41 yoshli Ronaldu ham boshqa futbolchilar kabi o‘z majburiyatlarini to‘liq bajarishi va jamoaviy o‘yinga moslashishi shart.
Portugaliyaning yakuniy qaydnomasi 19 may kuni e’lon qilinishi kutilmoqda. Agar Krishtianu ro‘yxatga kiritilsa, u o‘z faoliyatidagi oltinchi jahon chempionatida qatnashib, mutlaq rekord o‘rnatadi.
Tarixiy raqamlar va kutilayotgan bahslar
Krishtianu Ronaldu hozirda nafaqat Portugaliya, balki dunyo futbolida tengsiz ko‘rsatkichlarga ega:
226 ta o‘yin: Terma jamoa safida maydonga tushish bo‘yicha jahon rekordi;
143 ta gol: Xalqaro miqyosdagi eng ko‘p to‘p kiritgan futbolchi.
Portugaliyaliklar mundialdagi yurishini 17 iyun kuni Kongo DRga qarshi boshlashadi. Shundan so‘ng bizning yigitlarimiz va Kolumbiyaga qarshi muhim bahslar kutib turibdi. Ko‘pchilik ekspertlar Portugaliyani bosh sovringa asosiy da’vogarlardan biri sifatida ko‘rsatishmoqda. Ronaldu uchun esa bu faoliyatidagi yagona yetishmayotgan kubokni qo‘lga kiritish uchun so‘nggi imkoniyat bo‘lishi mumkin.
Sizningcha, O‘zbekiston terma jamoasi "K" guruhida Portugaliya va Ronalduga munosib qarshilik ko‘rsata oladimi?
“Zamin”ni Telegramʻda oʻqing!
