Kripto-maʼlumotlar tahlili bilan shugʻullanuvchi Dune kompaniyasi biznesni qayta tashkil etish va asosiy mahsulotlarga eʼtibor qaratish maqsadida xodimlarining 25 foizini qisqartirayotganini maʼlum qildi. Kompaniya asoschisi va bosh direktori Fredrik Haga X ijtimoiy tarmogʻida bu qaror minglab mijozlar foydalanadigan maʼlumotlar mahsulotlarini yanada takomillashtirish uchun zarur boʻlganini taʼkidladi. Bu haqda Cointelegraph.com xabar beradi.
Haga aniq xodimlar sonini ochiqlamagan boʻlsa-da, LinkedIn maʼlumotlariga koʻra, kompaniyada taxminan 150 nafar xodim faoliyat yuritgan. Shunga qaramay, rahbar kompaniyaning moliyaviy holati barqaror ekanligini va sunʼiy intellekt hamda kripto-aktivlarga boʻlgan institutsional qiziqishni rivojlantirishga toʻliq eʼtibor qaratishini bildirdi.
Joriy yilda texnologiya va kripto sektorida ish oʻrinlarini qisqartirish holatlari koʻpaymoqda. Koʻplab kompaniyalar sunʼiy intellekt texnologiyalaridan foydalanish samaradorlikni oshirayotganini taʼkidlab, xodimlarni optimallashtirishga majbur boʻlmoqda. Masalan, Coinbase va boshqa yirik platformalar ham shunga oʻxshash qadamlarni qoʻygan.
Dune kompaniyasi oʻzining Model Context Protocol (MCP) vositasiga katta umid bogʻlamoqda. Ushbu texnologiya sunʼiy intellektga maʼlumotlar infratuzilmasi yoki SQL tillarini bilmasdan turib, tahliliy boshqaruv panellarini yaratish imkonini beradi. Kompaniya valyutalar, aksiyalar, obligatsiyalar va tovarlar blokcheyn tizimiga oʻtayotganini hisobga olib, institutsional xizmatlarga investitsiya kiritishda davom etadi.
“Zamin”ni Telegramʻda oʻqing!
