Braziliya futboli afsonasi Kafu «Selekao»ning oltinchi jahon chempionligi sari yoʻlida Neymar zimmasiga oʻn yildan ortiq vaqt davomida adolatsiz yuk yuklangani jamoaga pand berganini taʼkidladi. Sobiq himoyachi 24 yildan buyon davom etayotgan sovrinsiz seriyaning asosiy sababi sifatida Neymar atrofida yetarlicha kuchli yordamchilar boʻlmaganini koʻrsatib oʻtdi. Bu haqda Goal.com xabar beradi.
Kafu 2002-yilgi gʻolib jamoa tarkibida Ronaldo, Rivaldo va Ronaldinho kabi yulduzlar birgalikda harakat qilganini esladi. Uning fikricha, oʻsha davrda jamoa muvaffaqiyati birgina futbolchiga bogʻliq boʻlmagan, aksincha, masʼuliyat teng taqsimlangan. Biroq, Neymar 2010-yildan buyon deyarli barcha ogʻirlikni yolgʻiz oʻzi koʻtarishga majbur boʻldi.
«Men Roberto Carlos bilan gaplashganimda, bu yigitning yolgʻiz qolgani naqadar achinarli ekanini aytgandim. U 15 yil davomida hamma narsani qilishga majbur boʻldi, ammo yolgʻiz harakat qilish foydasiz. Terma jamoa haqida gap ketganda, masʼuliyatni boʻlishish kerak», — deya taʼkidladi afsonaviy himoyachi.
Kafu 2026-yilgi jahon chempionatida Braziliya terma jamoasi muvaffaqiyatga erishishi uchun Neymar atrofida yangi yetakchilar shakllanishi shartligini qoʻshimcha qildi. Uning soʻzlariga koʻra, jamoa endilikda individual mahoratga emas, balki jamoaviy oʻyinga tayanishi kerak.
“Zamin”ni Telegramʻda oʻqing!
