Бразилия футболи афсонаси Кафу «Селекао»нинг олтинчи жаҳон чемпионлиги сари йўлида Неймар зиммасига ўн йилдан ортиқ вақт давомида адолатсиз юк юклангани жамоага панд берганини таъкидлади. Собиқ ҳимоячи 24 йилдан буён давом этаётган совринсиз сериянинг асосий сабаби сифатида Неймар атрофида етарлича кучли ёрдамчилар бўлмаганини кўрсатиб ўтди. Бу ҳақда Goal.com хабар беради.
Кафу 2002-йилги ғолиб жамоа таркибида Роналдо, Ривалдо ва Роналдиньо каби юлдузлар биргаликда ҳаракат қилганини эслади. Унинг фикрича, ўша даврда жамоа муваффақияти биргина футболчига боғлиқ бўлмаган, аксинча, масъулият тенг тақсимланган. Бироқ, Неймар 2010-йилдан буён деярли барча оғирликни ёлғиз ўзи кўтаришга мажбур бўлди.
«Мен Роберто Карлос билан гаплашганимда, бу йигитнинг ёлғиз қолгани нақадар ачинарли эканини айтгандим. У 15 йил давомида ҳамма нарсани қилишга мажбур бўлди, аммо ёлғиз ҳаракат қилиш фойдасиз. Терма жамоа ҳақида гап кетганда, масъулиятни бўлишиш керак», — дея таъкидлади афсонавий ҳимоячи.
Кафу 2026-йилги жаҳон чемпионатида Бразилия терма жамоаси муваффақиятга эришиши учун Неймар атрофида янги етакчилар шаклланиши шартлигини қўшимча қилди. Унинг сўзларига кўра, жамоа эндиликда индивидуал маҳоратга эмас, балки жамоавий ўйинга таяниши керак.
“Zamin”ни Telegram'да ўқинг!
