"Bavariya" darvozaboni Manuel Neuer chap boldiridagi mushak jarohati sababli shanba kuni boʻlib oʻtadigan Germaniya kubogi finalida VfB Stuttgart jamoasiga qarshi maydonga tusha olmaydi. Myunxen klubi juma kuni ertalab Neuer jamoani qoʻllab-quvvatlash uchun Berlinga borishini, biroq oʻyinga hali tayyor emasligini rasman tasdiqladi. Bu haqda Goal.com xabar beradi.
Sky xabariga koʻra, Manuel Neuerning tiklanish jarayoni ijobiy kechmoqda, biroq kichik xavf hali ham mavjud. 40 yoshli posbon Jahon chempionati oldidan oʻz sogʻligʻini xavf ostiga qoʻymaslikka qaror qildi. U boʻlajak turnirda Germaniya terma jamoasining asosiy darvozaboni sifatida maydonga tushishi kutilmoqda.
Final bahsida uning oʻrnini yana Jonas Urbig egallaydi. 22 yoshli zaxira darvozaboni uchun bu joriy mavsumdagi 20-uchrashuv va faoliyatidagi eng muhim oʻyin boʻladi. Shuningdek, bosh murabbiy Vincent Kompany qaydnomasidan Sven Ulreich va Jannis Bärtl ham oʻrin olgan.
Neuer joriy mavsumda mushak yirtilishi sababli dekabr, fevral va mart oylarida ham safdan chiqqan edi. Bundesliga soʻnggi turida "1. FC Köln" ustidan qozonilgan 5:1 hisobidagi gʻalaba vaqtida u ehtiyot chorasi sifatida almashtirilgan edi. Shunga qaramay, tajribali darvozabon oʻtgan yakshanba kuni klub bilan shartnomasini 2027-yilgacha uzaytirdi.
Payshanba kuni murabbiy Nagelsmann uni Shimoliy Amerikada boʻlib oʻtadigan Jahon chempionati uchun Germaniya terma jamoasining kengaytirilgan tarkibiga kiritdi. Terma jamoa oʻz tayyorgarlik jarayonini chorshanba kuni Herzogenaurach shahrida boshlaydi.
“Zamin”ni Telegramʻda oʻqing!
