“An Nasr” Saudiya Proligasi 2025/2026 yilgi mavsumida chempionlikni qo‘lga kiritganidan so‘ng, jamoa bosh murabbiyi Jorje Jezush kutilmagan qarorini e’lon qildi. Portugaliyalik mutaxassis Riyod klubidagi faoliyatini yakunlayotganini ma’lum qildi.
Jezushning so‘zlariga ko‘ra, u “An Nasr” taklifini asosan Krishtianu Ronalduga bergan va’dasi sabab qabul qilgan. Murabbiy portugaliyalik yulduzga chempionlikni qo‘lga kiritishda yordam berishini aytgan va ushbu maqsad amalga oshgach, jamoani tark etishini bildirgan.
“Men bu chaqiruvni faqat Krishtianuga: “Senga chempion bo‘lishga yordam beraman, biz sovrin yutamiz va keyin ketaman”, deb aytganim uchun qabul qilganman. Tamom. Men uchun vazifa bajarildi. Bu “An Nasr” bosh murabbiyi sifatidagi so‘nggi o‘yinim bo‘ldi”, — deya Jezushning so‘zlarini keltirdi Fabritsio Romano.
Bu bayonot “An Nasr” muxlislari uchun biroz kutilmagan bo‘ldi. Chunki Jezush jamoani chempionlikka olib chiqdi, raqobatli mavsumda “Al Hilol”ni ortda qoldirdi va klubga uzoq kutilgan katta yutuqni taqdim etdi. Shunday paytda murabbiyning ketishi futbolda hamma narsa faqat natija bilan o‘lchanmasligini yana bir bor ko‘rsatdi.
Portugaliyalik mutaxassis “An Nasr”ni 2025 yil avgust oyida qabul qilib olgan edi. Qisqa muddat ichida u jamoada tartib, ishonch va g‘alaba ruhini shakllantira oldi. Mavsum yakunida Riyod klubi 86 ochko to‘plab, Saudiya Arabistoni chempionati jadvalida birinchi o‘rinni egalladi.
Asosiy raqib “Al Hilol” 84 ochko bilan ikkinchi pog‘onada qoldi. Demak, chempionlik taqdiri juda keskin kurashda hal bo‘ldi. “An Nasr” so‘nggi turgacha bosim ostida harakat qildi, ammo hal qiluvchi pallada sovuqqonlikni saqlab, maqsadiga yetib bordi.
Bu chempionlik Krishtianu Ronaldu uchun ham alohida tarixiy ahamiyatga ega bo‘ldi. Portugaliyalik hujumchi va jamoa sardori ilk bor Saudiya Arabistoni chempioniga aylandi. U Riyodga kelganidan beri ushbu sovrin uchun kurashib kelayotgandi va nihoyat orzusiga erishdi.
Jezushning ketishi esa “An Nasr” oldiga yangi savollarni qo‘yadi. Chempion jamoa endi yangi murabbiy izlaydi, Ronaldu va klub rahbariyati esa keyingi mavsumda ham shu sur’atni saqlab qolish yo‘lini topishi kerak bo‘ladi. Chunki chempion bo‘lish qiyin, ammo chempionlikni himoya qilish undan ham og‘irroq.
Qisqasi, Jorje Jezush “An Nasr”da o‘z vazifasini bajardi: Ronalduga chempionlik olib berdi, klubni mamlakatning eng kuchli jamoasiga aylantirdi va ketishini e’lon qildi. Bu futboldagi kamyob ssenariylardan biri: murabbiy keldi, va’da berdi, bajardi va sahnani tark etdi. Savol endi boshqa — “An Nasr” bu g‘alabali davrni Jezushsiz davom ettira oladimi?
“Zamin”ni Telegramʻda oʻqing!
